عراقی الیکشن کمیشن نے پارلیمانی انتخابات کے مکمل نتائج کا اعلان کردیا

عراقی الیکشن کمیشن (آئی ایچ ای سی) نے ملک کے ابتدائی پارلیمانی انتخابات کے مکمل نتائج کا اعلان کرتے ہوئے شیعہ عالم دین مقتدی الصدر کی پارٹی کے برتری کا اعلان کیا ہے۔

عراقی الیکشن کمیشن (آئی ایچ ای سی) کے بورڈ آف کمشنرز کے صدر جسٹس جلیل عدنان خلف نے ایک پریس کانفرنس میں انتخابی نتائج کا اعلان کیا۔

سیاسی جماعتوں کی جیتی ہوئی نشستوں کی تفصیلات اس عرصے کے دوران نہیں دی گئیں۔ ووٹوں کی روایتی گنتی کے بعد پیر کو آئی ایچ ای سی کی طرف سے اعلان کردہ مکمل انتخابی نتائج میں کوئی خاص تبدیلی نہیں آئی۔

صدر جسٹس جلیل عدنان خلف نے بتایاکہ "انتخابی نتائج ابھی ابتدائی ہیں جن کے بارے میں بورڈ آف کمشنر سے اپیل کی جا سکتی ہے اور بورڈ کے فیصلوں کے خلاف انتخابی عدلیہ سے بھی اپیل کی جا سکتی ہے جہاں کئے گئے فیصلے حتمی ہوں گے۔"

مقامی میڈیا رپورٹ کے مطابق الصدر کی جماعت صدری تحریک 70 سے زائد نشستوں پر اور سابق وزیر اعظم نوری المالکی کی پارٹی اسٹیٹ آف لا اتحاد بغداد سمیت مرکزی اور جنوبی صوبوں کی 35 نشستوں پر آگے ہے۔

الفتح اتحاد جس میں حشد الشعبی سے تعلق رکھنے والی کچھ شیعہ ملیشیا شامل ہیں ، نے 14 نشستیں حاصل کیں۔ امتداد تحریک نے جنوبی صوبے دھیکار میں 9 نشستیں جیتیں۔

پارلیمنٹ کے سبکدوش اسپیکر محمد الحلبوسی کی قیادت میں تقدم اور ترقی پسند سیاسی اتحاد نے بغداد اور سنی صوبے میں 40 نشستیں حاصل کی ہیں۔ کرد لیڈر مسعود بارزانی کی پارٹی کردستان ڈیموکریٹک پارٹی نےاربیل اور ڈوہوک میں 32 کے ساتھ زیادہ تر نشستیں جیت لی ہیں۔

واضح رہے عراقی پارلیمانی انتخابات 2022 میں ہونے تھے لیکن عوامی خدمات میں بدعنوانی کے خلاف مہینوں کے احتجاج کے بعد اسے پہلے کرانا پڑا۔

عراق میں 10 اکتوبر کو عراقی شہریوں نے 8000 پولنگ اسٹیشنوں کی 329 نشستوں کے لیے 3249 امیدواروں کے حق میں اپنے حق رائے دہی کا استعمال کیا تھا۔

(یو این آئی)