سعودی عرب: نمازیوں میں کورونا کی تصدیق کے بعد پانچ مساجد بند

سعودی عرب کی وزارت اسلامی امور، دعوت اور رہنمائی نے کورونا وائرس کے بڑھتے کیسز اور نمازیوں کے کورونا مثبت پائے جانے کے بعد پانچ مساجد کو وقتی طور پر بند کر دیا ہے۔

سعودی عرب نے کورونا وائرس کو مزید پھیلنے سے روکنے کے لیے مزید پانچ مساجد کو وقتی طور پر بند کر دیا ہے۔

سعودی عرب کی وزارت اسلامی امور، دعوت اور رہنمائی نے مملکت کے تین ریجنز میں نمازیوں کے درمیان کورونا وائرس کی تصدیق کے بعد پانچ مزید مساجد بند کر دی ہیں۔

حالیہ فیصلے کے بعد کورونا وائرس کی موجودگی کی وجہ سے بند ہونے والی مساجد کی کل تعداد 62 ہوگئی ہے۔ وزارت کے فیصلے اور نمازیوں کی صحت کے پیش نظر ان میں 52 مساجد کے اندر سینیٹائزیشن اور صفائی کا کام مکمل ہونے کے بعد اسے نمازیوں کے لیے دوبارہ کھول دیا گیا ہے۔

وزارت دعوت نے نمازیوں سے اپیل کی ہے کہ وہ کورونا وائرس کے شبہ میں مسجد جانے سے پرہیز کریں تاکہ ان سے دوسرے نمازیوں میں کورونا وائرس منتقل نہ ہو سکے۔

وزارت کے اعلان میں بتایا گیا ہے کہ جن مساجد پر تالا بندی کی گئی ہے انہیں تمام احتیاطی تدابیر بشمول ان میں جراثیم کش اسپرے کے بعد ہی کھولا جائے گا۔

وزارت نے نمازیوں پر زور دیا ہے کہ وہ طے شدہ ایس او پیز پر عمل کرتے ہوئے نماز کی ادائیگی کے لیے مساجد کا رخ کریں۔ ان اقدامات میں چہرے پر ماسک لگانا، گھر سے جائے نماز لانا اور وبا سے بچاؤ کے لیے طے شدہ جسمانی فاصلہ برقرار رکھنا شامل ہیں۔

امام مساجد اور دیگر عملے کو ہدایت کی گئی ہے کہ نمازیوں کو ایس او پیز سے متعلق بتاتے رہیں اور اس ضمن میں ہونے والی کسی بھی خلاف ورزی کو فوری طور پر متعلقہ حکام کے نوٹس میں لائیں۔