فلسطین میں کورونا وائرس سے خاتون کی موت

فلسطین میں کورونا وائرس کے سبب ایک خاتون کی موت ہوگئی۔ فلسطین میں اس وبا سے یہ پہلی موت ہے جبکہ 64 افراد اس وبا سے متاثر ہوئے ہیں۔

فلسطینی حکومت کے ترجمان ابراہیم ملحم نے ایک بیان میں کہا کہ بیت المقدس کے نواحی علاقے بدو کی رہائشی ایک معمر خاتون کو چند روز قبل کورونا کی تشخیص کے بعد اسپتال منقل کیا گیا تھا۔ اسے یہ وائرس دوسرے افراد یا اسرائیل میں کام کرنے والے ملازمین سے لگا ہے۔

فوت ہونے والی خاتون کے داماد اور بعض دوسرے رشتہ داروں کو بھی کورونا کا شکار ہونے کا شبہ ہے، تاہم ان کے ٹیسٹوں کی رپورٹس جاری نہیں کی گئیں۔

فلسطینی اتھارٹی نے فلسطینی علاقوں میں کورونا وائرس کے باعث ہنگامی صورتحال کا اعلان کیا تھا۔ فلسطین میں کورونا کی وجہ سے تعلیمی ادارے ایک ماہ کے لیے بند کردیے گئے ہیں۔

ان احتیاطی تدابیر کے تحت بیت المقدس شہر میں مساجد اور گرجا گھروں کو بند کردیا گیا ہے۔ ریستوران، کیفے، جم، شادی ہال اور عوامی مقامات کو بھی بند کردیا گیا ہے۔