روس میں آئینی ترامیم پر ہونے والی ووٹنگ ملتوی

روس کے صدر ولادیمیر پوتن نے ایک حکمنامہ پر دستخط کر کے آئینی ترامیم پر ہونے والی ووٹنگ کو فی الحال ملتوی کر دیا ہے۔

روسی صدر کے دفتر کریملن نے جمعرات کو ایک بیان جاری کر کے یہ اطلاع دی ۔ بیان کے مطابق یہ فیصلہ کورونا وائرس (كووڈ -19) وبا کے خطرے کے پیش نظر روسی شہریوں کی صحت کو ذہن میں رکھ کر لیا گیا ہے ۔

روس میں آئینی ترامیم پر ہونے والی ملک بھر میں پولنگ کے لئے صدر کی جانب سے مستقبل میں ایک حکمنامہ جاری کر کے تاریخ کا اعلان کیا جائے گا ۔

مسٹر پوٹن نے قوم کے نام اپنے خطاب میں کہا کہ لوگوں کی حفاظت اور ان کی اچھی صحت ہی اولین ترجیح ہے۔

روسی صدر نے کہا’’ لوگوں کی صحت، زندگی اور سکیورٹی ہماری اولین ترجیح ہے، اس لئے میں مانتا ہوں کہ ووٹنگ کو ملتوی کیا جانا چاہئے‘‘۔ واضح رہے کہ روس میں آئینی ترامیم پر ووٹنگ کے لئے 22 اپریل کی تاریخ مقرر کی گئی تھی ۔