اطالوی وزارت خارجہ کے بیان کے مطابق، وسطی افریقی ملک کانگو میں اقوام متحدہ کے قافلے پر حملے کے دوران اطالوی سفیر لوکا آتان سیو اور دو پولیس آفیسر ہلاک ہوگئے۔
اطالوی وزارت خارجہ کی جانب سے کانگو میں سفیر کی ہلاکت کی تصدیق کرتے ہوئے کہا گیا ہے کہ لوکا آتان سیو اقوام متحدہ کے امن مشن قافلے کے ساتھ سفر کر رہے تھے کہ اسی دوران مشرقی کانگو کے علاقے گوما میں انہیں نشانہ بنایا گیا۔
قافلے پر حملہ شمالی کیو صوبے کے مشرقی ڈی آر سی شہر گوما میں ہوا جو روانڈا اور یوگنڈا کی سرحد کے ساتھ واقع ہے۔
یہ بھی پڑھیں:
میڈیا رپورٹ کے مطابق، اطالوی سفیر کو شدت پسندوں نے اغوا کرنے کی کوشش کی جس کے نتیجے میں دو پولیس اہلکار ہلاک اور اطالوی سفیر شدید زخمی ہوگئے تھے، تاہم سکیورٹی فورسز کی مداخلت کے باعث شدت پسند فرار ہوگئے جبکہ اطالوی سفیر کو ہسپتال میں داخل کرایا گیا تھا جہاں وہ زخموں کی تاب نہ لاتے ہوئے دم توڑ دیے۔
نارتھ کیو صوبہ الائیڈ ڈیموکریٹک فورسز (اے ڈی ایف) گروپ کا آبائی گھر ہے جو طویل عرصے سے یوگنڈا کے صدر یووری میوسینی کی مخالفت کرنے والے شدت پسندوں اور فوجوں کو اکٹھا کرتا ہے۔
اے ڈی ایف سنہ 1990 سے نارتھ کیو صوبے میں سرگرم ہے۔ سنہ 2017 میں اس گروپ نے داعش سے بیعت کی۔ اقوام متحدہ نے اس گروپ کو سیکڑوں شہریوں کے قتل کا ذمہ دار ٹھہرایا ہے۔