آسٹریلیا میں گرمی سے عوام پریشان

آسٹریلیا میں انتہائی گرم اور خشک موسم نے لوگوں کی زندگی کو مشکل بنا دیا ہے اور اس دوران محکمہ موسمیات کی جانب سے اس صورتحال کے جاری رہنے کی پیش گوئی سے پریشانیوں میں مزید اضافہ ہو گیا ہے۔

گرم اور خشک موسم کی وجہ سے آسٹریلیا کے بڑے حصے میں جنگلات میں آگ کے واقعات میں بھی مزید اضافہ ہوا ہے۔ خراب موسم کی وجہ سے کسان اور ان کے مویشی بری طرح متاثر ہیں اور متعدد علاقوں میں پانی کی کمی ہو گئی ہے۔
محکمہ موسمیات کے سربراہ ڈاکٹر اینڈریو واٹکنز کے مطابق موجودہ صورتحال کے لیے پازیٹو انڈین اوشین ڈپول (آئی او ڈی) ذمہ دار ہے۔
انہوں نے کہا کہ ’پازیٹو آئی او ڈی کی وجہ سے ہمارے ملک کے بیشتر علاقوں میں بارش بہت کم ہوتی ہے اور درجہ حرارت معمول سے کہیں زیادہ ہے۔ پازیٹو آئی او ڈی کی وجہ سے موسم گرما میں ہونے والی بارش کے لیے ذمہ دار شمالی مانسون کے بھی تاخیر سے آنے کا خدشہ ہے۔‘
اینڈریو واٹکنز نے چوکس رہنے کی صلاح دی ہے کیونکہ آنے والے مہینوں میں موسم مزید خراب ہو سکتا ہے۔