برطانوی وزیراعظم کی ترجمان مستعفی

کورونا پابندیوں کی خلاف ورزی کے معاملے میں ایک ویڈیو کے وائرل ہونے کے بعد وزیر اعظم ترجمان نے استعفیٰ دیا ہے۔

برطانوی وزیر اعظم بورس جانسن کی ترجمان ایلیگرا اسٹریٹن نے اپنے عہدے سے استعفیٰ دے دیا ہے۔

واضح رہے گزشتہ سال کورونا وائرس پابندیوں کی خلاف ورزی کرتے ہوئے برطانوی وزیر اعظم کے آفس اسٹاف نے کرسمس پارٹی منائی یا نہیں، اس بارے میں ایلیگرا اسٹریٹن کی مذاق کرتی ہوئی ایک ویڈیو لیک ہونے کے بعد سے حکومت کو شدید عوامی غصے کا سامنا تھا۔

وزیر اعظم بورس جانسن نے اپنی پریس سکریٹری کی لیک ویڈیو پر معذرت کی تاہم کرسمس پارٹی کرانے کی تردید بھی کی۔

انہوں نے کہا کہ کیبنٹ سکریٹری جائزہ لیں گے کہ آیا قواعد کی خلاف ورزی ہوئی یا نہیں، اگر ہوئی تو ملوث افراد کو کارروائی کا سامنا کرنا پڑے گا۔

(یو این آئی)