امریکی جاسوس طیارہ چین کے فضائی حدود میں داخل: چین

چین اور امریکہ کے مابین جاری سرد جنگ کے دوران چین نے دعوی کیا ہے کہ امریکہ نے مزید پیش قدمی کر دی ہے۔ ایسے میں امریکی اقدام چین کے لیے کتنا بڑا چیلنج ہو سکتا ہے اس کا اندازہ لگانا کافی مشکل ہے۔

چینی وزارت خارجہ کے ترجمان ژاو لیجیان نے بدھ کو یہ جانکاری دی کہ امریکہ کا ایک جاسوس طیارہ چین کے فضائی حدود کے نوفلائی زون میں اس وقت داخل ہوگیا جب چینی فوجی مشق کررہے تھے۔

یہ دریافت کئے جانے پر کہ کیا یہ واقعہ بین الاقوامی فضائی حدود میں پیش آیا تھاتو انہوں نے کہا کہ ظاہر ہے یہ چینی فضائی حدود اور اس کے حکمرانی والے علاقے کے اندر ہوا ہے۔

اس سے پہلے چینی وزارت دفاع نے اس ہفتہ کی ابتدا میں کہا تھا کہ جب چینی فوجی فائرنگ کی مشق کررہے تھے تو ایک یو۔2 جہاز نو فلائی زون میں داخل ہو گیا تھا۔

چین نے امریکی کارروائی کو اشتعال انگیز قرار دیا ہے اور اس کی مخالفت کی ہے۔