بھارت کے بعد امریکہ سے بھی چین کو زبردست جھٹکا

بھارت نے اتوار کی رات چین کے ٹک ٹاک سمیت 59 ایپ پر پابندی عائد کردی تھی۔ بھارت نے یہ قدم 15 جون کو وادی گلوان میں سرحد پر بھارتی فوجیوں کے ساتھ چینی فوج کی جھڑپ کے بعد اٹھایا تھا، جس میں 20 بھارتی فوجی جوان ہلاک ہوئے تھے۔

چین پر بھارت کی ڈیجیٹل اسٹرائک کے بعد امریکہ نے بھی ایک بڑی کارروائی کرتے ہوئے چینی کمپنیز ہواوے اور زیڈٹی ای کو قومی سلامتی کے لیے خطرہ قرار دیتے ہوئے کہا ہے کہ ان دونوں کمپنیوں کے سازوسامان کو ہٹانا ہوگا۔

امریکی صدر ڈونلڈ ٹرمپ پوری دنیا میں کورونا وائرس کی وبا پھیلانے کے لئے چین پر مسلسل حملہ آور ہیں اور اسی ضمن میں انہوں نے چین کی دونوں کمپنیز کے خلاف کارروائی کی ہے۔

امریکی فیڈرل کمیونی کیشن کمیشن (ایف سی سی) نے منگل کے روز 5-0 کے تناسب سے ووٹ دے کر چین کی تکنیک ساز کمپنی ہواوے اور زیڈ ٹی ای کو قومی خطرہ قرار دیا ہے۔ صرف یہی نہیں ٹرمپ حکومت نے امریکی کمپنیوں کو تکنیکی آلات خریدنے کے لئے ملنے والے 8.3 بلین ڈالر کے فنڈ کو بھی روک دیا ہے۔

ایف سی سی نے ایک بیان میں کہا کہ ٹیلی کام کمپنیز کو ان دونوں چینی کمپنیوں کے آلات کو انفراسٹرکچر سے ہٹانا ہوگا۔ بیان میں کہا گیا ہے کہ امریکہ چین کی کمیونسٹ پارٹی کو ہرگز امریکی سلامتی کے ساتھ کھلواڑ کرنے کی اجازت نہیں دے گا۔

واضح ر ہے کہ بھارت نے اتوار کی رات چین کے ٹک ٹاک سمیت 59 ایپ پر پابندی عائد کردی تھی۔ بھارت نے یہ قدم 15 جون کو وادی گلوان میں سرحد پر بھارتی فوجیوں کے ساتھ چینی فوج کی جھڑپ کے بعد اٹھایا تھا، جس میں 20 بھارتی فوجی جوان ہلاک ہوئے تھے۔

بھارت کی طرف سے چینی ایپ پر پابندی لگائے جانے کے بعد، چین نے اسے انتہائی تشویشناک اقدام قرار دیا ہے اور بین الاقوامی اصولوں کی دہائی دینا شروع کردیا ہے۔