تمل ناڈو کے ضلع سلیم کے ناریپلم کے پاس دو بسوں کے درمیان آمنے سامنے کی ٹکر میں پڑوسی ملک نیپال کے 6 سیاحوں کی موت ہوگئی اور 28دیگر زخمی ہوگئے۔
پولیس نے بتایا کہ یہ حادثہ بدھ کی دیر رات اس وقت ہوا جب نیپال کے دارالحکومت کاٹھمنڈو سے آئے 34سیاح ایک بس سے کنیا کماری گھومنے کے بعد راجستھان جارہے تھے۔
نیپالی سیاحوں نے رات میں ایک مندر کے ہال میں ٹھہرنے کا منصوبہ بنایا تھا، جس کے بعد جمعرات کی صبح انہیں راجستھان روانہ ہونا تھا۔
نیپالی سیاحوں سے بھری بس کے ڈرائیور نے جب ایک موڑ پر گاڑی کو موڑنے کی کوشش کی تبھی بینگلورو سے ترووننتپورم جانے والی ایک دوسری بس سے اس کی ٹکر ہوگئی۔
اس حادثے میں ایک خاتون سمیت 6 نیپالی سیاحوں کی موت ہوگئی۔ زخمیوں کو سرکاری ہسپتال میں داخل کرایا گیا ہے۔ پولیس جائے وقوع پر پہنچ کر حادثے کی جانچ کررہی ہے۔