وزیر اعظم نریندر مودی نے اتوار کو روم میں جی 20 سربراہی اجلاس کے موقع پر جرمن چانسلر انجیلا مرکل سے ملاقات کی اور دونوں ممالک کے درمیان دو طرفہ تعلقات پر تفصیلی تبادلہ خیال کیا۔
انجیلا مرکل کے ساتھ وزیر اعظم نریندر مودی کی ملاقات میں اگلے ممکنہ چانسلر اولاف شلز بھی موجود تھے۔
وزیر اعظم کے دفتر (پی ایم او) نے ایک ٹوئٹ میں کہا’’ وزیر اعظم نریندر مودی اور جرمن چانسلر انجیلا مرکل نے روم میں جی20 گروپ کے سربراہی اجلاس کے موقع پر ملاقات کی۔
دونوں رہنماؤں نے بھارت-جرمنی تعلقات پر وسیع پیمانے پر بات چیت کی۔ دونوں ممالک کے درمیان مضبوط دوستی ہمارے کرہ ارض کی بہتری کے لیے اچھا اشارہ ہے۔‘‘
اس کے علاوہ وزیر اعظم نریندر مودی نے اسی دن انڈونیشیا کے صدر جوکو ودودو سے بھی ملاقات کی اور تجارت، سرمایہ کاری سمیت جامع اسٹریٹجک شراکت داری پر تبادلہ خیال کیا۔
مودی نے انڈونیشیا کو جی 20 کی اگلی صدارت کا عہدہ سنبھالنے پر بھی مبارکباد دی۔
وزیر اعظم نے ٹویٹ کیا ’’آج صدر جوکو ودودو سے مل کر خوشی ہوئی۔ بھارت اور انڈونیشیا کے درمیان تعاون کے موجودہ شعبوں کے ساتھ ساتھ نئے شعبوں پر بھی تبادلہ خیال کیا گیا جہاں دونوں ممالک اپنے شہریوں کے فائدے کے لیے مل کر کام کر سکتے ہیں۔
واضح رہے کہ انڈونیشیا اگلی جی 20 کی صدارت سنبھالے گا، جب کہ بھارت یکم دسمبر 2022 سے جی 20 کی صدارت کرے گا اور 2023 میں جی 20 رہنماؤں کے سربراہی اجلاس کی میزبانی کرے گا۔
