لاہور پولیس اسٹیشن پر خودکش حملہ ناکام

پاکستان کے کاؤنٹر ٹیررازم ڈپارٹمنٹ کے عہدیداروں نے لاہور پولیس اسٹیشن پر عسکریت پسندوں کے ایک ممکنہ خودکش حملے کو ناکام بنانے کا دعوی کیا ہے۔ مشتبہ عسکریت پسند فورسز کے ساتھ فائرنگ کے تبادلے میں مارا گیا۔

منگل کے روز پاکستان کے کاؤنٹر ٹیررزم ڈپارٹمنٹ کے عہدیداروں نے بتایا کہ انہوں نے ایک مشتبہ خودکش حملہ آور کو اس وقت گولی مار کر ہلاک کر دیا، جب وہ لاہور کے نزدیک ایک پولیس اسٹیشن میں داخل ہونے کی کوشش کر رہا تھا۔

پاکستانی میڈیا 'ڈان' کی خبر کے مطابق پولیس کی جانب سے جاری کردہ بیان میں کہا گیا ہے کہ مشتبہ عسکریت پسند منگل کے روز علی الصبح فائرنگ کے تبادلے میں اس وقت ہلاک ہوا، جب اسے برکی گاؤں میں پولیس اسٹیشن کے احاطے میں رکنے کے لئے کہا گیا، لیکن اس نےگارڈز پر گولی چلا دی۔

بیان میں کہا گیا کہ وہ شخص دھماکہ خیز بنیان پہنے ہوئے تھا اور اس کی جیب میں دو دستی بم تھے۔ پولیس نے دھماکہ خیز بنیان، دو دستی بم اور ایک پستول کی تصاویر جاری کرتے ہوئے بتایا کہ مشتبہ شخص یہ سبھی چیزیں اپنے ساتھ لے جا رہا تھا۔

حکام نے مزید تفصیلات فراہم نہیں کی ہے اور بتایا کہ علاقے میں سرچ آپریشن جاری ہے۔