بھارت میں بنی کووڈ ویکسین پاکستان کو سپلائی کی جائے گی

بھارت کے سیرم انسٹیٹیوٹ آف انڈیا کی جانب سے مارچ کے وسط تک تیار کی جانے والی آسٹرا زینیکا ویکسین کی پہلی کھیپ پاکستان کو سپلائی کی جائے گی۔

بھارت کی جانب سے 'گلوبل الائنس فار ویکسینز اینڈ امیونائییزیشن' گیوی کے ذریعہ پاکستان کو ایک کروڑ 60 لاکھ کووڈ ویکسین ڈوزیز سپلائی کیے جائیں گے۔

عہدیداروں کے مطابق، بھارت کے سیرم انسٹیٹیوٹ آف انڈیا کی جانب سے مارچ کے وسط تک آسٹرا زینیکا ویکسین کی پہلی کھیپ پاکستان کو سپلائی کی جائے گی۔

چیئرمین رانا تنویر حسین کی سربراہی میں پی اے سی کے اجلاس کے دوران وزارت صحت اور نیشنل انسٹی ٹیوٹ آف ہیلتھ کے عہدیداروں نے کہا کہ گیوی کی جانب سے پاکستان کو آکسفورڈ آسٹرا زینیکا کووڈ ویکسین کے 16 ملیئن یعنی ایک کروڑ 60 لاکھ ڈوزیز سپلائی کیے جائیں گے۔

پاکستان کی وزارت صحت اور این آئی ایچ کے عہدیداروں نے پی اے سی کو آگاہ کیا کہ چین کی بنائی گئی کین سینو ویکسین کے تیسرے مرحلے کا ٹرائل 75 فیصد افادیت کے ساتھ مکمل ہو گیا ہے۔ اس دوران 18 ہزار افراد کو یہ ویکسین دی گئی ہے۔

پارلیمانی سیکرٹری صحت ڈاکٹر نوشین حامد نے کہا 'گیوی کی جانب سے فراہم کردہ ویکسین 4 کروڑ 50 لاکھ لوگوں کو دی جائے گی، اس کے علاوہ مزید ایک کروڑ افراد کے لیے اضافی ویکسین خریدنے کے لیے کابینہ نے 150 ملین امریکی ڈالر کی منظوری دی ہے۔