پاکستان: بابر کروز میزائل کا کامیاب تجربہ

پاکستان نے بابر کروز میزائل کا کامیاب تجربہ کیا ہے۔ یہ کروز میزائل 490 کلومیٹر تک زمین سے سمندر میں ہدف کو نشانہ بنانے کی صلاحیت رکھتا ہے۔

پاک فوج کے شعبہ تعلقات عامہ (آئی ایس پی آر) کے مطابق پاکستان نے کروز میزائل بابر کا کامیاب تجربہ کیا ہے۔ بابر کروز میزائل کا تجربہ ملٹی ٹیوب میزائل لانچ وہیکل کے ذریعے کیا گیا ہے۔

آئی ایس پی آر کا کہنا ہے کہ بابر کروز میزائل 490 کلومیٹر تک زمین، سمندر میں ہدف کو نشانہ بنانے کی صلاحیت رکھتا ہے۔

پاک فوج کے ترجمان کے مطابق اس موقع پر چئیرمین نیسکام ڈاکٹر رضا ثمر سمیت کمانڈر آرمی اسٹریٹجک فورس کمانڈ لیفٹننٹ جنرل محمد علی اور دیگر اعلیٰ حکام موجود تھے۔

چیئرمین نیسکام نے مسلح افواج کے تربیتی، آپریشنل تیاریوں کے معیار اور ویپن سسٹم کی ہینڈلنگ کو سراہا جبکہ سائنسدانوں اور انجینئرز کی ملکی اسٹریٹجک صلاحیتوں کی ترقی میں کردار کو سراہا۔

پاکستان نے بابر کروز میزائل کا کامیاب تجربہ کیا

صدر عارف علوی، وزیر اعظم عمران خان اور سروسز چیفس نے کامیاب تجربے پر جوانوں کو مبارکباد دی۔

خیال رہے کہ رواں ماہ کے آغاز میں پاکستان نے بیلسٹک میزائل غزنوی کا کامیاب تجربہ کیا تھا، غزنوی میزائل زمین سے زمین 290 کلو میٹر تک ہدف کو نشانہ بنا سکتا ہے۔

آئی ایس پی آر کا کہنا تھا کہ غزنوی میزائل جوہری اور روایتی ہتھیار لے جانے کی صلاحیت رکھتا ہے۔ میزائل کا تجربہ سالانہ فیلڈ ٹریننگ مشق کے تحت کیا گیا ہے۔