نواز شریف کی طبیعت بگڑی،دوبارہ ہسپتال داخل

پاکستان کے سابق وزیر اعظم نواز شریف کی طبیعت خراب ہونے کی وجہ سے انہیں پیر کو دیر رات ہسپتال میں داخل کرایا گیا۔

نیب لاہور کی ٹیم سابق وزیر اعظم کو لے کر سروسز ہسپتال پہنچی جہاں وی آئی پی روم میں انہیں منتقل کرنے کے بعد ان کا علاج جاری ہے۔
نواز شریف کی ہسپتال آمد پر کارکنوں کی بڑی تعداد وہاں موجود تھی۔نیب کی جانب سے جاری ہونے والے بیان میں کہا گیا کہ ’’نواز شریف کی طبیعت اب بہتر ہے، ادویات کی وجہ سے ان کے خون کے خلیات میں کمی آئی تھی، سروسز ہسپتال میں ان کا مکمل چیک اپ ہوگا تاہم فی الحال ڈینگو ٹسٹ منفی آیا ہے‘‘۔
ان کا کہنا تھا کہ ’’نواز شریف کے خون کے خلیات میں اضافہ کیا جائے گا‘‘۔
قبل ازیں پاکستان مسلم لیگ (ن) کے صدر شہباز شریف نے نواز شریف کو فوری ہسپتال داخل نہ کرنے پر شدید احتجاج کرتے ہوئے کہا تھا کہ سرکاری رپورٹس میں سنگین خطرات کی واضح نشاندہی کی گئی، اس کے باوجود نواز شریف کی جان سے کھیلا جارہا ہے‘‘۔