بنگلہ دیش میں عید کی نماز، سماجی فاصلہ ندارد

بنگلہ دیش میں انفیکشن اور ہلاکتوں کی تعداد میں مسلسل اضافہ ہو رہا ہے، یہی وجہ ہے کہ انتظامیہ نے بڑے پیمانے پر جمع ہو کر نماز پڑھنے سے احتیاط کرنے کی اپیل کی تھی۔

بنگلہ دیش کے مسلمانوں نے پیر کو عیدالفطر کا تہوار منایا اور شکرانے کی نماز کے لیے لوگوں کا ہجوم امڈ پڑا۔

دارالحکومت ڈھاکہ کی مرکزی بیت المکرم مسجد میں ہزاروں افراد مرحلہ وار نماز میں شریک ہوئے کیونکہ حکام نے انہیں گروپز میں داخل ہو کر نماز ادا کرنے کی اجازت دی تھی۔

بہت سے لوگ مسجد میں داخل ہونے کے لئے ایک گھنٹے سے زائد قطار میں کھڑے نظر آئے۔

بنگلہ دیش میں انفیکشن اور ہلاکتوں کی تعداد میں مسلسل اضافہ ہو رہا ہے، یہی وجہ ہے کہ انتظامیہ نے بڑے پیمانے جمع ہو کر نماز پڑھنے سے احتیاط کرنے کی اپیل کی تھی۔

تقریبا 16 کروڑ مسلمانوں کا ملک بنگلہ دیش نے بڑے اجتماعات پر پابندی عائد کر رکھی ہے، لیکن لوگوں کو فاصلے کے ساتھ نماز ادا کرنے کی اجازت دی گئی ہے۔

پیر کے روز ملک بھر میں تین لاکھ سے زائد مساجد میں عید الفطر کی نماز ادا کی گئی جبکہ متعدد افراد نے اپنے گھروں میں ہی نماز ادا کی۔

واضح رہے کہ بنگلہ دیش میں کورونا کی وجہ سے 480 افراد ہلاک ہوئے ہیں۔ یہاں مجموعی طور پر کورونا متاثرین کی تعداد 33،610 ہو گئی ہے۔