ملیریا کی دوا کورونا مریضوں کے لیے فائدہ مند نہیں

برطانیہ کے ماہرین کے مطابق کورونا مریضوں کے لیے ہائڈروکسی کلوروکائن دوا فائدہ مند ثابت نہیں ہورہی ہے۔

برطانیہ میں کئے گئے ایک مطالعہ میں ماہرین نے پایا کہ ملیریا کی دوا ہائڈروکسی کلوروکائن کے استعمال سے کوویڈ۔19 انفیکشن کے مریض صحتیاب نہیں ہورہے ہیں۔ ماہرین نے کورونا متاثرین کو ملیریا کی دوا دینے کی مخالفت کی ہے۔

ایک ہزار 542 مریضوں پر کئے گئے مطالعہ سے پتہ چلا ہے کہ 28 دن کے بعد ہائڈروکسی کلوروکائن دوا استعمال کرنے والے 25.7 فیصد مریض ہلاک ہوگئے جبکہ معمولی دیکھ بھال کئے گئے 23.5 فیصد مریضوں کی موت ہوئی ہے۔

آکسفورڈ یونیورسٹی کے مطالعہ کے نتائج کے بعد ملیریا کی دوا سے فائدہ کو مسترد کیا گیا۔ نتائج کو ابھی شائع نہیں کیا گیا لیکن جلد ہی تمام تفصیلات فراہم کرنے کا اعلان کیا گیا۔

ہائڈروکسی کلوروکائن دوا کا ملیریا، لیوپس اور رمیٹوئڈ ارتھتس کے علاج کے لیے طویل عرصہ سے استعمال کیا جاتا رہا ہے لیکن یہ دوا کورونا کے علاج کےلیے محفوظ و موثر نہیں ہے۔

امریکی صدر ٹرمپ اس دوا کی بہت تعریف کی ہے لیکن امکانی طور پر اس دوا کے ضمنی اثرات مرتب ہوسکتے ہیں۔

اس طرح دنیا کے دیگر علاقوں میں بھی ہائڈروکسیکلوروکائن کو لیکر تحقیقات کی جارہی ہے۔ تاہم آکسفورڈ کی جانب سے کئے گئے مطالعہ کے مکمل نتائج سامنے آنے کے بعد ہی ملیریا کی دوا کے تعلق سے اہم معلومات حصول ممکن ہوسکے گا۔