انڈیا یونیورسٹی میں پولیٹیکل سائنس کے ممتاز پروفیسر سمت گنگولی نے افغانستان سے امریکی انخلا پر تبصرہ کرتے ہوئے بتایا کہ بگرام ایئربیس انتہائی اہمیت کا حامل فوجی اڈہ تھا۔ یہاں سے امریکی افواج نے افغانستان بھر میں القاعدہ اور طالبان کو نشانہ بنایا تھا۔ انہوں نے بتایا کہ بگرام ہوائی اڈہ انتہائی جدید طرز کا تھا جہاں افواج کےلیے تمام ترسہولتیں مہیا کرائی گئیں تھی اور سیکورٹی کے اعتبار سے بھی انتہائی محفوظ مانا جاتا تھا۔
سمت گنگولی نے بتایا کہ امریکی افواج کی جانب سے بگرام ایئربیس کا انخلا کئے جانے کے بعد افغان فورسس کو مختلف چیلنجز کا سامنا ہے۔ انہوں نے بتایا کہ فی الحال پورے گلف خطہ میں امریکہ کا ایئربیس صرف قطر میں ہی واقع ہے، جس کی وجہ سے اب افغانستان میں القاعدہ اور طالبان کے خلاف کاروائی کےلیے امریکہ کو دشواری ہوگی۔
انہوں نے مزید بتایا کہ افغانستان سے امریکی افواج کے انخلا کے باوجود جنگ زدہ ملک میں 600 سے زائد امریکی فوجی تعینات رہیں گے جو امریکی سفارتخانہ و دیگر مفادات کا تحفظ کریں گے۔ سمت گنگولی نے بتایا کہ افغانستان سے امریکی افواج کا ڈرامائی انداز میں انخلا کا عمل تیزی سے جاری ہے۔