بھارت میں چینی مصنوعات کو نذر آتش کیا گیا

مئی کے اوائل سے ہی لداخ کے گلوان وادی میں ایل اے سی پر بھارت اور چین کی فوجیں تعینات ہیں اور دونوں ممالک کا کہنا ہے کہ وہ فوجی اور سفارتی چینلز کے ذریعے بات چیت کر رہے ہیں۔

بھارت اور چین کے درمیان کشیدگی کے سبب پیر کے روز نئی دہلی میں درجنوں مظاہرین نے چینی سامان جلا کر چینی پروڈکٹ کے بائیکاٹ کرنے کی اپیل کی۔

ملک بھر کے لاکھوں تاجروں کی نمائندگی کرنے والے 'کنفڈریشن آف آل انڈیا ٹریڈرز' کے مظاہرین نے چینی سامان کے بائیکاٹ کا نعرہ لگایا اور چینی سامان خریدنے اور فروخت کرنے کے خلاف آواز بلند کی۔

رواں ماہ کی 15 تاریخ کو لداخ میں بھارت اور چین کے سرحدی تنازع میں بھارتی فوج کے 20 جوان ہلاک ہوئے تھے، جس کے بعد سے ہی بھارتی عوام میں چین کے خلاف غصے کا ماحول ہے۔

بھارتی وزیر اعظم نریندر مودی نے جمعہ کے روز کہا تھا کہ فوجی جوانوں کی ہلاکت پر پورے ملک کو تکلیف ہوئی ہے اور لوگ غصے میں ہیں۔

انہوں نے مزید کہا کہ بھارت امن اور دوستی کا خواہاں ہے، لیکن خودمختاری کو برقرار رکھنا سب سے اہم ہے۔

خیال رہے کہ مئی کے اوائل سے ہی لداخ کے گلوان وادی میں ایل اے سی پر بھارت اور چین کی فوجیں تعینات ہیں اور دونوں ممالک کا کہنا ہے کہ وہ فوجی اور سفارتی چینلز کے ذریعے بات چیت کر رہے۔

ماہرین کا ماننا ہے کہ دونوں ممالک کے درمیان جنگ کا امکان نہیں ہے، لیکن کشیدگی کو جلد ختم نہیں کیا جا سکتا ہے۔