بھارتی رہنماؤں کی بائیڈن اور ہیرس کو مبارکباد

امریکہ کے صدارتی انتخابات میں ڈیموکریٹک امیدوار جو بائیڈن کو بھاری اکثریت حاصل ہونے کے بعد متعدد رہنماؤں نے انہیں مبارکباد پیش کی ہیں۔

امریکی صدارتی انتخابات 2020 میں ڈیموکریٹک امیدوار جوزف بائیڈن صدر ڈونلڈ ٹرمپ پر ناقابل شکست برتری حاصل کر کے عملاً امریکہ کے 46 ویں صدر منتخب ہوگئے۔

بھارتی صدر رام ناتھ کووند نے نو منتخب صدر کو مبارکباد دیتے ہوئے کہا ہے کہ 'جوزف آر بائیڈن کے ریاستہائے متحدہ امریکہ کے صدر اور کملا ہیرس کے نائب صدر منتخب ہونے پر مبارکباد پیش ہے'۔

بہ شکریہ ٹوئٹ

انہوں نے کہا ہے کہ 'ایک کامیاب دور اور بھارت ۔ امریکہ کے تعلقات کو مزید مستحکم کرنے کے لئے ہم ساتھ مل کر کام کرنے کے منتظر ہیں'۔

بھارت کے وزیراعظم نریندر مودی نے کہا ہے کہ 'جو بائیڈن کی شاندار فتح پر مبارکباد! سابقہ دور میں بطور نائب صدر کے بھارت اور امریکہ کے تعلقات کو مستحکم کرنے میں آپ کا تعاون اہم اور انمول رہا'۔

بہ شکریہ ٹوئٹ

مودی نے کہا ہے کہ 'اب میں بھارت ۔ امریکہ تعلقات کو مزید اونچائی پر لے جانے کے لئے ایک بار پھر مل کر کام کرنے کا منتظر ہوں'۔

بھارتی وزیراعظم نریندر مودی نے کملا ہیرس کو مبارک باد دیتے ہوئے کہا ہے کہ 'آپ کو دلی مبارکباد! آپ کی کامیابی نہ صرف آپ کے لیے بلکہ تمام بھارتی نژاد امریکیوں کے لئے بھی بہت فخر کی بات ہے'۔

بہ شکریہ ٹوئٹ

انہوں نے کہا ہے کہ 'مجھے یقین ہے کہ بھارت ۔ امریکہ تعلقات آپ کی حمایت اور قیادت سے مزید مضبوط ہوں گے'۔

حزب اختلاف کے رہنما، کانگریس پارٹی کے سابق صدر اور رکن پارلیمنٹ راہل گاندھی نے بھی نئے منتخب کردہ صدر و نائب صدر کے لیے مبارکباد پیش کی ہے۔

بہ شکریہ ٹوئٹ

راہل گاندھی نے ٹویٹ کیا ہے کہ 'مجھے یقین ہے کہ وہ امریکہ کو متحد کریں گے اور اسے مضبوط سمت فراہم کرے گا'۔

انہوں نے کہا ہے کہ 'نو منتخب نائب صدر کو بھی مبارک ہو! اس سے ہمیں فخر ہوتا ہے کہ امریکہ کی نائب صدر کی حیثیت سے خدمات انجام دینے والی پہلی خاتون کی جڑیں بھارت میں ہیں'۔

رکن پارلیمنٹ ششی تھرور نے کہا ہے کہ 'خوشی ہوئی ہے کہ جو (بائیڈن) بھی اب اڈلی اور ڈوسا سے لطف اندوز ہوں گے'۔

بہ شکریہ ٹوئٹ

واضح رہے کہ بائیڈن کی جیت کے بعد نیویارک سمیت امریکہ کے بیشتر شہروں میں جشن کا ماحول ہے۔

ڈیموکریٹک پارٹی کے امیدوار جو بائیڈن نے امریکہ کا 59 واں صدارتی انتخاب جیت لیا ہے۔

انہیں ریاست پینسلوینیا میں کامیابی کے بعد 20 الیکٹورل کالج ووٹ حاصل ہوئے ہیں جس کے بعد ان کا کل الیکٹورل ووٹ 273 ہو گئے ہیں۔

واضح رہے کہ امریکی صدر منتخب ہونے کے لیے 270 الیکٹورل ووٹوں کی ضرورت ہوتی ہے۔