پاکستانی میڈیا کے مطابق ملک کے سابق وزیر اعظم میاں نواز شریف کی والدہ شمیم اختر کا انتقال ہو گیا۔ میڈیا نے بتایا کہ ان کی طبیعت گزشتہ ایک ماہ سے خراب تھی اور وہ لندن میں زیر علاج تھیں۔
اس خبر کی تصدیق کرتے ہوئے مسلم لیگ ن کے رہنما عطا تارڑ نے ایک ٹوئٹ کیا، جس میں انہوں نے لکھا کہ'میاں نواز شریف اور میاں شہباز شریف کی والدہ محترمہ وفات پا گئی ہیں۔ انا لللہ و انا الیہ راجعون'۔
سابق وزیراعظم نواز شریف کا فی الحال لندن میں ہی علاج چل رہا ہے اور ان کی والدہ بھی لندن میں انتقال کر گئیں، جبکہ دوسرے بیٹے شہباز شریف لاہور کی جیل میں قید ہیں۔
شریف خاندان کے ذرائع نے بتایا کہ مرحومہ شمیم اختر کی نماز جنازہ لندن میں ہی ادا کی جائے گی اور جسد خاکی کل پاکستان کے لیے روانہ کیا جائے گا۔
اس موقع پر پاکستان کے وزیر اعظم عمران خان اور بلاول بھٹو سمیت دیگر سینئر رہنماوں نے نواز شریف کی والدہ کے انتقال پر تعزیت کا اظہار کیا ہے۔