جانئیے، امریکہ اردگان کو کس طرح مشکل میں ڈالنا چاہتا ہے؟

امریکہ کا کہنا ہے کہ شام میں جنگ بندی کی خلاف ورزی کے سبب ترکی کو دوبارہ اقتصادی پابندیوں کا سامنا کرنا ہو گا۔ امریکی وزیر خزانہ نے مجوزہ پابندیوں کی فہرست کو برقرار رکھنے کی بات کہی ہے، تاکہ ضرورت پڑنے پر اسے دوبارہ نافذ کیا جا سکے۔

امریکی وزیر خزانہ اسٹیفن منوچن کی جانب سے ترکی کے خلاف اقتصادی پابندیوں کی دھمکی دی گئی ہے۔ وزیر خزانہ کا کہنا ہے کہ ٹرمپ انتظامیہ نے ترکی کے خلاف پابندیوں کا ایک پیکج تیار کر رکھا ہے۔ ضرورت پڑنے پر ان پابندیوں کو نافذ کیا جاسکتا ہے۔

اسٹیفن کا کہنا ہے کہ شام میں جنگ بندی سے فی الحال امریکہ کو اطمینان ہے، اسی وجہ سے امریکی حکومت نے ترکی پر پابندیوں کا خاتمہ کیا ہے۔

ان کا مزید کہنا ہے کہ جنگ بندی کی خلاف ورزی کے سبب ترکی کو دوبارہ اقتصادی پابندیوں کا سامنا کرنا ہو گا۔ وزیر خزانہ نے مجوزہ پابندیوں کی فہرست کو برقرار رکھنے کی بات کہی ہے، تاکہ ضرورت پڑنے پر اسے دوبارہ نافذ کیا جا سکے۔

اس سلسلے میں امریکہ نے ایک بل بھی منظور کیا ہے، جس میں صدر ڈونلڈ ٹرمپ سے ترکی کی فوجی کارروائی کے نتیجے میں ترکی پر پابندیاں عائد کرنے کا مطالبہ کیا گیا ہے۔

اس بل میں ترکی کو امریکی اسلحے کی فروخت پر پابندی بھی شامل ہے۔ ساتھ ہی اردگان کی آمدنی اور خاندانی دولت کے حساب کتاب کی بھی بات کہی گئی ہے۔ شام کے حملے میں شامل ترک عہدیداروں کے خلاف پابندیاں اور ترک حکومت کے زیر ملکیت بینکوں کو بلیک لسٹ کیے جانے کا مطالبہ شامل ہے۔

غور طلب ہے کہ 9 اکتوبر سنہ 2019 میں ترکی نے شام کے شمال مشرقی علاقوں پر کردوں کے خلاف فوجی کارروائی کی شروعات کی تھی۔

اس کاررائی کے نتیجے میں امریکہ نے ترکی پر اقتصادی پابندی عائد کر دی تھی، لیکن امریکی نائب صدر مائک پینس اور وزیر خارجہ مائک پومپیو کی اردگان سے ملاقات کے بعد جنگ بندی کا معاہدہ کیا گیا تھا۔ بعد ازاں امریکہ نے پابندیاں ختم کرنے کا فیصلہ کیا تھا۔

ایسے میں دیکھنے والی بات ہو گی کہ ترکی اس معاملے میں کیا اقدام کرتا ہے۔