گزشتہ دو ماہ سے چین میں کورونا وائرس سے ہاہاکار مچی ہوئی ہے اور روز بہ روز اس سے متاثرین کی تعداد اور ہلاک ہونے والوں کی تعداد میں اضافہ ہورہا ہے اور اس مہلک وائرس سے مرنے والوں کی تعداد 2236 ہوگئی ہے جبکہ 75 ہزار 465 مریضوں میں اس وائرس کے انفیکشن کی تصدیق ہوئی ہے۔
یہ اعداد و شمار چین کی قومی صحت کمیشن کی جانب سے جاری کئے گئے ہیں، ہیلتھ کمیشن نے بتایا کہ قومی ہیلتھ کمیشن کو 31 صوبوں سے ملی اطلاع کے مطابق تقریباً 75 ہزار 465 افراد میں اب تک کورونا وائرس کی تصدیق ہوئی ہے۔
ان متاثرین میں 59 ہزار 965 افراد ابھی بھی کوروناوائرس میں مبتلاء ہیں جس میں 11 ہزار سے زائد مریضوں کی حالت تشویشناک ہے جبکہ 2 ہزار 236 لوگوں کی موت ہوچکی ہے وہیں 18 ہزار 264 لوگوں کو علاج کے بعد اسپتال سے چھٹی دے دی گئی۔
واضح رہے کہ کورونا وائرس کا پہلا معاملہ دسمبر میں چین کے ہوبئی صوبے کے ووہان شہر میں سامنے آیا تھا، اس کے بعد سے یہ وائرس دنیا کے 25 سے زائد ممالک میں پھیل چکا ہے۔
جنوری کے آخر میں عالمی ادارہ صحت نے کورونا وائرس کے بڑھتے انفیکشن کے پیش نظر عالمی صحت کے لیے ایمرجنسی کا اعلان کیا تھا۔
