چین نے میڈیکل ماہرین کی ٹیم پاکستان بھیجی

چین نے پاکستان کو کورونا وائرس سے نمٹنے کے لئے امداد کے طور پر میڈیکل ماہرین کی ٹیم بھیجی ہے۔

چینی وزارت خارجہ کے ترجمان جینگ شوانگ نے پریس کانفرنس میں بتایا کہ نیشنل ہیلتھ کمیشن نے سنکیانگ یغور آٹونومس ریجن کے محکمہ صحت کی جانب سے منتخب ماہروں کو لے کر یہ ٹیم بنائی ہے۔ یہ ٹیم سنیچر کو پاکستان کے لئے روانہ ہوئی۔

پاکستان میں کورونا وائرس کی وبا سے اب تک گیارہ لوگوں کی موت ہوچکی ہے جبکہ 1373 لوگوں کو اس بیماری سے متاثرہونے کی تصدیق ہوئی ہے۔

پنجاب صوبہ اس سے سب سے زیادہ متاثر ہے جہاں اب تک پانچ لوگوں کی جانیں جاچکی ہیں اور 490 لوگوں کی جانچ رپورٹ مثبت آئی ہے۔