چین نے جو بائیڈن اور کملا ہیرس کو بالآخر مبارکباد دی

امریکی صدارتی انتخابات کے نتائج کو تقریبا 10 روز ہو چکے ہیں، دنیا بھر کے متعدد سربراہان مملکت جو بائیڈن کو انہیں امریکی صدر منتخب کیے جانے کے بعد مبارکباد دی ہے، لیکن چین نے مبارکباد نہیں دی تھی۔ بالآخر چین کی طرف سے بھی جو بائیڈن اور کملا ہیرس کو مبارکباد دی گئی ہے۔

امریکی صدارتی انتخابات کے کئی روز بعد بیجنگ کی خاموشی ٹوٹی ہے۔ چین نے آخر کار جمعہ کے روز امریکہ کے نو منتخب صدر جو بائیڈن اور نائب صدر کملا ہیرس کو امریکی صدر اور نائب صدر کے طور پر منتخب ہونے پر مبارکباد دی۔

چینی وزارت خارجہ کے ترجمان نے کہا کہ 'ہم امریکی عوام کے انتخاب کا احترام کرتے ہیں۔ ہماری طرف سے جو بائیڈن اور ہیرس کو مبارکباد'۔

امریکی اخبار واشنگٹن پوسٹ کی رپورٹ کے مطابق چینی وزارت خارجہ کے ترجمان وانگ وینبن نے اپنی ریگولر نیوز کانفرنس میں یہ مبارکباد دی۔

وانگ نے کہا 'ہم سمجھتے ہیں کہ امریکی انتخابی نتائج کی تصدیق امریکی قانون اور طریقہ کار کی بنیاد پر ہوگی'۔