حکام نے جمعرات کو بتایا کہ تسمانیہ کے ساحل سے 88 پائلٹ وہیلوں کو بچا کر انہیں گہرے پانی میں چھوڑا گیا ہے اور 20 دیگر کو آزاد کرنے کی کوشش جاری ہے۔
تسمانیہ کے اسٹرین شہر کے ساحل پر وہیل مچلیوں کی ایک بڑی تعداد کم گہرے پانی میں آ کر بری طرح پھنس گئی تھی، جن میں سے 88 کو بچایا گیا ہے، جبکہ 380 وہیل ہلاک ہو گئی ہیں۔ ان کی لاشوں کو نکالنے کی تیاری کی جا رہی ہے۔
تسمانیہ پارکس اور وائلڈ لائف سروس منیجر نک ڈیکا نے بتایا کہ ریسکیو عملے کو 20 وہیلیں ملی ہیں جو ریسکیو کے چوتھے روز بھی زندہ ہیں۔
خیال رہے کہ پیر اور بدھ کے روز اسٹرین شہر کی ساحل پر تقریبا 500 وہیل دیکھی گئی تھیں۔
میرین کنزرویشن پروگرام وائلڈ لائف میں ماہر حیاتیات کرس کارلین نے کہا کہ سیکڑوں ٹن والی وہیل کی لاشوں کو ہٹانے کا کام جمعہ کو شروع کیا گیا ہے اور اس میں کچھ دن لگنے کا امکان ہے۔