ترکی کے مغربی شہر ازمیر میں جمعہ کو آنے والے شدید زلزلے کے نتیجے میں ہلاکتوں کی تعداد بڑھ کر 26 اور زخمیوں کی تعداد 800 سے زائد ہو گئی ہے۔
ریختر پیمانے پر زلزلے کی شدت 7 درج کی گئی تھی، جس کے سبب مزید ہلاکتوں کا خدشہ ظاہر کیا جا رہا ہے۔
ملبے تلے دبے افراد کو نکالنے کے لیے امدادی کارروائیاں جاری ہیں۔قدرتی آفات سے نمٹنے والی ترک ایجنسی کے مطابق ازمیر میں زلزلے سے تقریباً 20عمارتیں منہدم ہوئی ہیں۔
شہر کاری کے ترک وزیر کے حوالے سے میڈیا نے خبر دی ہے کہ زلزلے سے منہدم ہونے والی 8 عمارتوں میں راحت رسانی کا عمل مکمل کرلیا گیا ہے۔
ترک وزیرصحت نے اپنے ایک بیان میں بتایا کہ زلزلے میں زخمی ہونے والے 364 افراد طبی امداد کے بعد اسپتال سے رخصت کر دیےگئے ہیں۔
ہنگامی حالات سے نمٹنے والے محکمے کے صدر دفتر کی طرف سے ویب سائٹ پر فراہم کردہ معلومات کے مطابق ازمیر کے علاقے سفری حصار سے 17 کلومیٹر دور بحیرہ ایجیئن میں ترکی کے مقامی وقت کے مطابق دو بجکر 51 منٹ پر زلزلے کے جھٹکے محسوس کیے گئے۔ زلزلہ زیر زمین 16.54 کلومیٹر کی گہرائی میں آیاتھا۔