افغانستان میں اب تک بچوں کی پیدائش کے کاغذات پر صرف والد کا نام لکھا جاتا تھا، شادیوں کے دعوت ناموں اور یہاں تک کہ ان کی قبروں کے کتبوں پر بھی خواتین کا نام لکھنا معیوب سمجھا جاتا ہے لیکن اب یہ روایت ختم ہوگئی ہے اور پیدائش سرٹیفکیٹ پر والدہ کا نام بھی لکھا جائے گا۔
یہ خواتین کے حقوق کے لیے کام کرنے والی تنظیموں اور کارکنان کی کوششوں کا ثمرہ ہے۔
کابینہ کمیٹی کی اس اجازت کے بعد اب یہ بل کو پارلیمنٹ میں پیش کیا جائے گا جہاں بل کو قدامت پسند سیاستدانوں کی جانب سے مخالفت کا سامنا بھی رہے گا۔ امید کی جاتی ہے کہ پارلیمانی منظوری کے بعد ملک کے صدر بل پر دستخط کردیں گے۔
حکومت کی کوشش ہے کہ مذکورہ بل کو رواں ماہ 21 ستمبر تک جاری رہنے والے پارلیمنٹ کے اجلاس سے منظور کروائے۔
افغانستان میں کچھ عرصے سے 'میرا نام کہاں ہے' کے ہیش ٹیگ سے ایک مہم شروع کی گئی تھی اور اسی مہم کے دوران افغانستان کی خواتین سے امور سے متعلق کمیٹی کی چیئرمین و رکن پارلیمان ناہید فرید نے بچوں کی پیدائش سے متعلق قوانین میں ترمیم کا مجوزہ بل پیش کیا تھا۔ اس میں برتھ سرٹیفکیٹ میں ماں کا نام بھی شامل کرنے کی تجویز رکھی گئی تھی۔
مذکورہ بل پر افغان کابینہ نے یکم ستمبر کو اجلاس منعقد کیا۔ نائب صدر محمد سرور دانش کی سربراہی میں قانونی معاملات کی کمیٹی کے اجلاس میں ناہید فرید کے تجویز کردہ قانون کا جائزہ لے کر اس کی منظوری دے دی گئی۔
کابینہ کمیٹی نے آبادی کے اندراج کے قوانین میں بھی ترمیم کی منظوری دی اور بچوں کی پیدائش کی اسناد میں والدہ کے نام کو شامل کرنے کی اجازت دی۔
ماضی میں طالبان کے دور میں اہم عہدوں پر تعینات رہنے والوں نے تنقید کرتے ہوئے مذکورہ قانون کو جہاں یورپ اور امریکہ کا قانون گردانا ہے وہیں حکومتی فیصلے پر خواتین کے حقوق کے لیے کام کرنے والی تنظیموں اور رہنماؤں نے اطمینان کا اظہار کرتے ہوئے کہا ہے کہ مذکورہ فیصلے سے خواتین کو صدیوں بعد اپنی شناخت ملے گی۔
