افغانستان: تصادم میں 27 شدت پسند ہلاک، 16 زخمی

افغان نیشنل آرمی (اے این اے) نے بتایا کہ 'افغان صوبے قندھار میں مسلح تصادم میں 27 طالبان شدت پسند ہلاک اور 16 دیگر زخمی ہوگئے ہیں۔

افغان فوج کے عہدیداروں کے مطابق طالبان کی جانب سے گزشتہ شب ضلع کالن کیچہ، موشان اور میواند میں آرمی چوکیوں پر حملے کئے گئے تھے۔

کور کے ترجمان احمد صادق عیسیٰ نے بتایا کہ 'حملوں کے بعد افغانستان نیشنل آرمی(اے این اے) کی فورسز اور طالبان کے مابین زبردست تصادم ہوا جس میں 27 شدت پسند مارے گئے اور 16 دیگر زخمی ہوئے ہیں۔

انہوں نے مزید کہا کہ اس جھڑپ میں افغان نیشنل آرمی کا کوئی بھی اہلکار زخمی نہیں ہوا ہے۔

واضح رہے کہ دارالحکومت کابل میں، حکومت اور طالبان کی جانب سے 'انٹرا افغان امن مذاکرات' شروع کرنے کی کوششوں کے درمیان ملک میں تشدد پھیلا ہوا ہے۔