جنوبی وزیرستان: حملے میں چار فوجی جوان اور چار شدت پسند ہلاک

پاکستان کے جنوبی وزیرستان میں شدت پسندوں نے سیکیورٹی فورسز کی ایک چیک پوسٹ پر حملہ کیا۔ جوابی کارروائی میں چار شدت پسند مارے گئے، وہیں، شدت پسندوں سے لڑتے ہوئے پاکستان فوج کے چار جوان بھی ہلاک ہوگئے۔

پاکستان کے صوبہ خیبرپختونخوا کے قبائلی ضلع جنوبی وزیرستان کے علاقے مکین میں سیکیورٹی فورسز کی ایک چیک پوسٹ پر شدت پسندوں کے حملے کے دوران ہونے والی فائرنگ کے نتیجے میں پاک فوج کے چار جوان ہلاک ہوگئے ہیں۔

پاک فوج کے شعبۂ تعلقات عامہ (آئی ایس پی آر) کے مطابق، سیکیورٹی فورسز کی جوابی کارروائی کے نتیجے میں چار شدت پسند بھی ہلاک ہوئے ہیں۔

جنوبی وزیرستان میں شدت پسندوں کی جانب سے پاک سیکیورٹی فورسز پر حملہ

آئی ایس پی آر کا کہنا ہے کہ شدت پسندوں کی فائرنگ سے ہلاک ہونے والے جوانوں میں لانس نائک عمران علی، سپاہی عاطف جہانگیر، سپاہی عزیز اور سپاہی انیس الرحمٰن شامل ہیں۔

پاک فوج کے شعبۂ تعلقاتِ عامہ کا یہ بھی کہنا ہے کہ علاقے میں کلیئرنس آپریشن جاری ہے۔

دوسری جانب پنجاب کے وزیر اعلیٰ سردار عثمان بزدار نے جنوبی وزیرستان میں چیک پوسٹ پر شدت پسندوں کے حملے کی شدید مذمت کی ہے۔

خیال رہے کہ وزیرستان میں سیکیورٹی فورسز اور شدت پسندوں کے درمیان اکثر جھڑپیں ہوتی رہتی ہیں، جس میں سیکیورٹی فورسز نے حالیہ جھڑپوں کے دوران کئی شدت پسندوں کو ہلاک کیا ہے۔

اس سے قبل دو فروری کو سیکیورٹی فورسز نے پاک-افغان سرحد کے قریب لوئر دیر میں کارروائی کے دوران تین شدت پسندوں کو ہلاک کیا تھا۔