افغانستان: افغان سیکورٹی فورسیز کے 15اہلکار ہلاک

شورش زدہ افغانستان کے دومختلف حملوں میں طالبان جنگجوؤں نے چیک پوسٹوں پرحملہ کرکے 7 فوجی اور 8 پولیس اہلکاروں کو ہلاک کردیا۔

ذرائع کے مطابق طالبان جنگجوؤں نے صوبہ بلخ میں ہائی وے پولیس چیک پوسٹ پر دھاوا بول دیا جسکے نتیجہ میں 8 اہلکار ہلاک ہوگئے تاہم 6 اہلکار اپنی جانیں بچانے میں کامیاب ہوگئے۔ اس حملہ میں ایک پولیس اہلکار نے طالبان جنگجوؤں کی مدد کی تھی۔

اسی طرح صوبہ تخار میں بھی طالبان جنگجوؤں نے ایک فوجی چیک پوسٹ پر حملہ کردیا، جس میں افغان فوج کے 7 اہلکار لقمہ اجل بن گئے۔ سرکاری حکام کا دعویٰ ہے کہ جوابی کارروائی میں 11 جنگجو بھی مارے گئے تاہم طالبان نے اپنے ساتھیوں کی ہلاکت کی تردید کی ہے۔

واضح رہے کہ امریکہ اور طالبان کے درمیان تعطل کے شکار امن مذاکرات کی بحالی کے باوجود افغانستان میں سیکورٹی فورسز پر حملوں میں کمی نہیں آئی ہے جبکہ اسی دوران امریکی بیس پر حملہ میں ایک اہلکار بھی ہلاک ہوا تھا۔