افغانستان میں 15 شدت پسند ہلاک

ایک طرف قطر کے دارالحکومت دوحہ میں افغان حکومت اور طالبان کے درمیان افغانستان میں امن قائم کرنے کی کوششیں جاری ہیں، دوسری طرف ملک میں ہر روز دھماکے اور حملے کیے جا رہے ہیں، جس سے امن کی کوششیں مزید پیچیدہ ہو سکتی ہیں۔

افغانستان کے وسطی صوبہ اروزگان میں سرکای سکیورٹی فورسز کی جانب سے کیے گئے فضائی حملے میں کم ازکم 15 طالبانی شدت پسند ہلاک اور 13 زخمی ہوئے ہیں یہ معلومات صوبائی گورنر کے ترجمان احمد شاہ ساحل نے پیرکے روز دی۔

انہوں نے کہا طالبانی شدت پسندوں نے گزشتہ شب ضلع گیزب میں حفاظتی دستوں کی چوکیوں پر حملہ کیا۔ اس کے بعد فضائیہ نے ان کے خفیہ ٹھکانوں کونشانہ بنایا۔ اس حملے میں ایک طالبانی کمانڈر سمیت 15 شدت پسند ہلاک اور دوکمانڈر سمیت13 دیگرزخمی ہوئے ہیں۔

حالانکہ طالبان نے ابھی تک اس حملے کے تعلق سے کوئی تبصرہ نہیں کیا ہے۔ ضلع گیزب کے ایک ذرائع نے بتایا کہ فضائیہ نے سیدن گاوں میں فضائی حملے کیے۔

ذرائع کے مطابق اس حملے میں دوبچوں اور ایک خاتون کی موت ہوئی ہے، جبکہ اروزگان کے افسران نے شہریوں کے ہلاک ہونے کے بارے میں کوئی تبصرہ نہیں کیا ہے۔