بھارتی نژاد امیدوار امریکی سینیٹ کے انتخاب میں حصہ لینے کیلئے کوشاں

اوشا ریڈی ہیٹن کی میئر ہیں۔ انہوں نے تاحال اپنی عطیہ مہم کے ذریعہ ایک لاکھ سے زائد ڈالر کی رقم جمع کرلی ہے۔ 54 سالہ ریڈی ڈیموکریٹک پارٹی سے نامزدگی کے حصول کیلئے کوشاں ہیں۔

ریاست آندھرا پردیش سے تعلق رکھنے والی بھارتی نژاد امریکی خاتون اوشا ریڈی' ریاست کنساس سے امریکی سینیٹ میں داخلہ کی دوڑ میں شامل ہیں'۔

اپنے والدین کے ہمراہ 1973ء میں متحدہ ریاست آندھرا پردیش سے امریکہ منتقل ہوئی تھیں۔ اس وقت اُن کی عمر محض 8 برس تھی۔

انہوں نے گزشتہ ماہ کنساس کے شہر ہیٹن کی میئر کے طور پر حلف لیا تھا۔ ریپبلکن کے موجودہ سینیٹر پیاٹ رابرٹس نے دوبارہ انتخابات میں حصہ نہ لینے کا اعلان کیا ہے۔ اس طرح رواں برس نومبر میں ہونے والے انتخابات میں یہ نشست خالی رہ گئی ہے۔

واضح رہے کہ کنساس ریپبلکن کا قلعہ رہا ہے اور یہاں سے 1932ء سے کبھی بھی کوئی ڈیموکریٹ امیدوار منتخب نہیں ہوپایا۔ 4 اگست کو ڈیموکریٹک پارٹی کا انتخاب ہوگا جس کیلئے اوشا کے بشمول 4 امیدوار اس دوڑ میں شامل ہیں۔