افغانستان سے امریکی فوجی انخلاء کے بعد طالبان کی حکومت سازی کے عمل کے درمیان امریکی سینیٹر گراہم لِنڈسے نے کہا ہے کہ دہشت گردی ایک بڑا خطرہ اب بھی موجود ہے، اس لیے امریکی فوج کو مستقبل میں دوبارہ افغانستان جانا پڑے گا۔
برطانوی نشریاتی ادارے کو دئیے گئے انٹرویو میں امریکی سینیٹر گراہم لِنڈسے نے کہا ہے کہ ایک بار پھر نوے کی دہائی دہرائی جا رہی ہے، دہشت گردی ایک بڑا خطرہ اب بھی موجود ہے۔ اس لیے امریکی فوج کو مستقبل میں دوبارہ افغانستان جانا پڑے گا۔
انہوں نے کہا کہ دہشت گردی ایسا معاملہ نہیں جسے یوں ہی چھوڑ دیا جائے، طالبان کے نظریات دور حاضر کے تقاضوں کے خلاف ہیں اور افغانستان میں سخت قوانین اور ایسی حکومت کا تسلط قائم کریں گے جو ہمارے لیے تکلیف کا باعث ہوسکتا ہے۔
سینیٹر گراہم لنڈسے نے خدشہ ظاہر کرتے ہوئے کہا کہ طالبان ایک بار پھر القاعدہ کو محفوظ مقام اور پھلنے بھولنے کا موقع دیں گے جو امریکہ کے لیے سب سے زیادہ تشویش کی بات ہوگی، القاعدہ کو ہماری طرز زندگی پسند نہیں، اس لیے وہ ہم پر حملے کریں گے اور ہمیں مشرق وسطیٰ سے نکال باہر کریں گے۔
یہ بھی پڑھیں: امریکی وزیر خارجہ اور وزیر دفاع دوحہ پہنچے
ماضی کا تذکرہ کرتے ہوئے گراہم لنڈسے کا کہنا تھا کہ نوے کی دہائی میں بھی خواتین پر سخت پابندیاں لگائی گئی تھیں اور لڑکیوں کو اسکول جانے سے روکا گیا تھا اور ہزارہ اقلیتوں کا قتل عام کیا گیا اور اسی دور میں نائن الیون کا واقعہ ہوا تھا، شاید تاریخ خود کو دہرائے گی اور دوبارہ ویسے ہی حالات پیدا ہوں گے جس کے لیے امریکی فوج کو دوبارہ افغانستان کا رخ کرنا پڑے گا۔
(یو این آئی)
