کملا ہیرس کی شہریت اور اہلیت پر ٹرمپ نے اٹھایا سوال

امریکی صدر ڈونلڈ ٹرمپ نے امریکی نائب صدر کے عہدے کے لیے بھارتی نژاد امیدوار کملا ہیرس کی شہریت اور اہلیت پر سوالات کھڑے کیے ہیں۔

امریکی صدر ڈونلڈ ٹرمپ نے جمعرات کے روز سینیٹر اور ڈیموکریٹک پارٹی کی نائب صدر کی امیدوار کملا ہیرس کی جائے پیدائش اور اہلیت پر سوالات کھڑے کرنے کے علاوہ سابق نائب صدر اور ڈیموکریٹک کے نامزد صدارتی امیدوار جو بائیڈن نیز سابق صدر بارک اوباما کو بھی نشانہ بنایا۔

میڈیا سے خطاب کے دوران، صدر ٹرمپ نے چیپمین یونیورسٹی کے پروفیسر جان ایسٹمین کے ایک مضمون کا حوالہ دیتے ہوئے سوال کیا کہ کیا محترمہ کملا ہیرس صدر اور نائب صدر منتخب ہونے کے لیے اہل ہوسکتی ہیں؟

مسٹر ٹرمپ نے مزید کہا کہ انہیں محترمہ ہیرس کی اہلیت کے بارے میں کوئی اطلاع نہیں ہے۔

محترمہ ہیرس امریکہ میں کیلیفورنیا کے شہر آکلینڈ میں پیدا ہوئی تھیں۔ ان کے والد جمائیکا سے ہیں اور والدہ کا تعلق بھارت سے ہے۔ وہ امریکی آئین کے مطابق ملک کی نائب صدر یا صدر بننے کی اہلیت کو پورا کرتی ہیں۔

مسٹر ٹرمپ نے اس سے قبل سابق امریکی صدر بارک اوباما کی اہلیت پر بھی اسی طرح کے سوالات اٹھائے تھے۔