امریکی صدارتی انتخابات : ٹرمپ اور جارجیا کے الیکشن چیف کی آڈیو وائرل

ٹرمپ کی جارجیا کے الیکشن چیف کے ساتھ یہ بات چیت سب سے پہلے واشنگٹن پوسٹ کی جانب سے پوسٹ کی گئی ہے۔ اس کال ریکارڈنگ کے بعد دی ایسوشی ایٹڈ پریس نے بھی کال ریکارڈنگ شیئر کی ہے۔

امریکی صدر ڈونلڈ ٹرمپ کا ایک آڈیو سامنے آیا ہے، جس میں وہ جارجیا کے انتخابی چیف سے جو بائیڈن کی جیت کو کالعدم قرار دینے کی التجا کر رہے ہیں۔

ٹیلیفون کال پر وہ الیکشن چیف کو یہ مشورہ دے رہے ہیں کہ وہ ٹرمپ کی جیت کے لیے ووٹ نکالیں۔ ٹرمپ کی جانب سے اتوار کے روز ٹویٹر پر یہ تصدیق بھی کی گئی تھی کہ انہوں نے جارجیا کے سیکریٹری آف اسٹیٹ ریپبلیکن بریڈ ریفنسپرگر سے بات چیت کی ہے۔

ٹرمپ کی جارجیا کے الیکشن چیف کے ساتھ یہ بات چیت سب سے پہلے واشنگٹن پوسٹ کی جانب سے پوسٹ کی گئی ہے۔ اس کال کی ریکارڈنگ کے بعد دی ایسوشی ایٹڈ پریس نے بھی کال ریکارڈنگ حاصل کی ہے۔

ایسوشی ایٹڈ پریس نے کال کا مکمل آڈیو جاری نہ کرنے کو ترجیح دی ہے، کیونکہ ان کا ماننا ہے کہ غلط معلومات کو بڑھاوا نہ دینا ان کی پالیسی ہے۔

واضح رہے کہ جارجیا نے تصدیق شدہ انتخابی نتائج سے یہ ظاہر کیا ہے کہ بائیڈن نے ریاست میں 3 نومبر کو ہونے والے انتخابات میں 11،779 ووٹوں سے کامیابی حاصل کی تھی۔

وہیں اس کال کے سلسلے میں جارجیا کے سیکریٹری آف اسٹیٹ ریپبلیکن بریڈ ریفنسپرگر نے اپنے رد عمل کا اظہار نہیں کیا ہے۔