امریکہ میں روس کے سفیر اناتولی انتونوف نے بدھ کے روز کہا کہ ماسکو کے خلاف عائد کی جا رہی پابندیاں Sanctions on Russia عالمی معیشت، انرجی مارکیٹوں اور شہریوں کو نقصان پہنچائیں گی۔
روسی سفارت خانے نے فیسبک پیج پر کہا کہ ’’پابندیوں سے روس کے تعلق سے کچھ بھی حل نہیں ہوگا۔ یہ تصور کرنا مشکل ہے کہ امریکہ میں کوئی بھی پابندیوں کے خطرے کے تحت اپنی خارجہ پالیسی پر نظرثانی کرنے کے لیے روس پر اعتماد کر رہا ہے‘‘۔
انہوں نے کہا کہ مجھے ایک بھی دن یاد نہیں جب ہمارا ملک مغربی دنیا کی پابندیوں کے بغیر رہا ہو۔ ہم نے سیکھا کہ ایسے حالات میں کیسے کام کرنا ہے اور نہ صرف زندہ رہنا ہے بلکہ اپنے ملک کی ترقی بھی کرنی ہے۔
انہوں نے کہا ’’اس میں کوئی شک نہیں کہ ہمارے خلاف پابندیاں عالمی مالیاتی اور انرجی مارکیٹوں کو نقصان پہنچائیں گی۔ اس کا اثر امریکہ پر بھی پڑے گا، جہاں عام شہری بڑھتی ہوئی قیمتوں کی زد میں آئیں گے‘‘۔
یہ بھی پڑھیں: Sanctions on Russia: یوروپی یونین، آسٹریلیا، جاپان اور کینیڈا کا روس پر پابندیاں عائد کرنے کا فیصلہ
ان کا یہ تبصرہ صدر ولادیمیر پوتن کے مشرقی یوکرین میں اپنی فوجیں بھیجنے کے اقدام کے بعد روس پر پابندیاں عائد کرنے والے ممالک کی بڑھتی ہوئی تعداد کے جواب میں تھا۔
واضح رہے کہ یوروپی یونین، آسٹریلیا، جاپان اور کینیڈا نے روس کی طرف سے مشرقی یوکرین کے ڈونیٹسک اور لوہانسک کو الگ الگ آزاد ریاست کے طور پر تسلیم کرنے اور مشرقی یوکرین میں روسی فوج کو بھیجنے کے خلاف روس پر پابندیاں عائد کرنے کا فیصلہ کیا ہے۔ اس سے پہلے امریکہ اور برطانیہ نے بھی روس پر پابندیوں کا اعلان کر چکے ہیں۔
