نیویارک میں طوفانی بارش، معمولات زندگی درہم برہم

امریکی شہر نیویارک میں شدید بارش کی وجہ سے سیلاب جیسی صورتحال پیدا ہوگئی ہے۔ سڑکوں پر پانی جمع ہونے سے عام زندگی مفلوج ہوگئی۔

نیویارک میں شدید بارش کا سلسلہ جاری ہے جس کی وجہ سے شہر میں سیلاب جیسے حالات پیدا ہوئے ہیں۔ نیویارک کی اکثر سڑکوں پر پانی جمع ہوگیا اورایک سب وے اسٹیشن میں پانی جمع نے سے مسافرین کو کافی مشکلات کا سامنا کرنا پڑا۔

سوشیل میڈیا پر اپرمنھتن کے ویسٹ 157 اسٹریٹ پر واقع سب وے اسٹیشن میں پانی جمع ہونے کا ایک ویڈیو وائرل ہوگیا جس میں کمر تک پانی کو دیکھا جاسکتا ہے۔ وہیں، برونکس میں میجر ڈیگان ایکسپریس وے پانی کی سطح میں اضافہ کے بعد کچھ ڈرائیورز پھنس گئے۔ ڈرائیورز کو سڑک کی ایک طرف سے گذرتے ہوئے دیکھا گیا جبکہ سڑک کے دوسری طرف پانی جمع تھا۔

نیویارک شہر میں ہونے والی شدید بارش کی وجہ سے کئی علاقوں میں پانی جمع ہوگیا اور متعدد گاڑیاں پانی میں ڈوب گئیں۔ امریکی محکمہ موسمیات نے نیویارک کے علاوہ دیگر ریاستوں میں مزید بارش کی پیش قیاسی کی ہے۔

گذشتہ روز سمندری طوفان ایلسا کی وجہ سے مشرقی فلوریڈا میں شدید بارش ہوئی جس میں ایک شخص ہلاک اور متعدد زخمی ہوئے۔ طوفان کی وجہ سے فلوریڈا اور جارجیا میں 65 کیلومیٹر فی گھنٹہ کی رفتار سے ہوائیں چل رہی تھیں۔ گذشتہ جمعرات کو سمندری طوفان جنوبی کیرولینا پہنچا تھا جس کے بعد طوفان کی شدت میں کچھ کمی دیکھی گئی۔