دنیا کے کئی ممالک میں کورونا کی نئی قسم اومیکرون کے کیسز رپورٹ ہو رہے ہیں۔ ایسے میں بھارت میں بھی الرٹ ہے۔ بیرون ممالک سے آنے والے مسافروں کی اسکریننگ کی جارہی ہے۔ لندن اور ایمسٹرڈیم سے دہلی کے اندرا گاندھی بین الاقوامی ہوائی اڈے پر پہنچنے والی پرواز کے چار مسافر کورونا سے متاثر پائے گئے ہیں۔ دو روز کے دوران 5 مریضوں کا کورونا ٹیسٹ مثبت آیا۔
نیدرلینڈ اور برطانیہ سے دہلی آنے والے چار مسافر کورونا وائرس سے متاثر پائے گئے ہیں اور اب ان کے نمونے جینوم سیکونسنگ کے لیے بھیجے گئے ہیں، تاکہ یہ معلوم کیا جاسکے کہ یہ لوگ وائرس کی نئی شکل 'اومیکرون' سے متاثر ہیں یا نہیں۔
ذرائع نے بتایا کہ ان سبھی کو لوک نائک جے پرکاش (ایل این جے پی) ہسپتال میں متاثرہ افراد کے لیے مخصوص وارڈ میں رکھا گیا ہے۔ "ایمسٹرڈیم اور لندن سے چار پروازیں 12 بجے سے صبح 6 بجے کے درمیان 1,013 مسافروں کے ساتھ اندرا گاندھی بین الاقوامی ہوائی اڈہ پہنچی۔ ان میں سے چار مسافر متاثر پائے گئے ہیں۔
انہوں نے بتایا کہ یہ تمام بھارتی شہری ہیں۔ مرکز کے مطابق خطرے سے دوچار ممالک کی فہرست میں یورپی ممالک، برطانیہ، جنوبی افریقہ، برازیل، بنگلہ دیش، بوتسوانا، چین، ماریشس، نیوزی لینڈ، زمبابوے، سنگاپور، اسرائیل اور ہانگ کانگ شامل ہیں۔ اس فہرست میں شامل ممالک سے بھارت آنے والے لوگوں کو منگل کی آدھی رات سے اضافی قواعد پر عمل کرنا ہوگا۔
