کورونا وائرس سے بری طرح متاثر امریکہ میں گذشتہ 24 گھنٹوں کے دوران کورونا کے ریکارڈ 1.28 لاکھ سے زیادہ نئے کیسز رپورٹ ہوئے ہیں جس سے متاثرین کی تعداد 97 لاکھ سے تجاوز کر گئی ہے۔
این بی سی نیوزکی رپورٹ کے مطابق مسلسل تیسرے دن امریکہ میں کورونا وائرس کے ایک لاکھ سے زیادہ نئے کیسز کی اطلاع ملی ہے۔
جان ہاپکنز یونیورسٹی کے سینٹر برائے سائنس اینڈ انجینئرنگ کے جاری کردہ تازہ ترین اعدادوشمار کے مطابق امریکہ میں کورونا سے اموات کی تعداد 2،36،064 ہوگئی ہے،جبکہ متاثرہ افراد کی تعداد 97 لاکھ سے تجاوز کر کے97،33،359 ہوگئی ہے۔
امریکہ کی ریاست نیو یارک ، نیو جرسی اور کیلیفورنیا کورونا سے سب سے زیادہ متاثر ہیں۔ صرف نیو یارک میں ہی کورونا وائرس سے 33،664 اموات ہوئیں۔
نیو جرسی میں اب تک 16،416، کیلیفورنیا میں17،931 اور ٹیکساس میں 19،046 افراد اپنی زندگیوں سے ہاتھ دھو بیٹھے ہیں، جبکہ فلوریڈا میں کووڈ 19 سے متاثر 17،014 مریضوں نے جانیں گنوائی ہیں۔ اس کے علاوہ میساچوسیٹس اور الینوائے میں 10،000 جبکہ پینسلوینیا میں کورونا سے آٹھ ہزار سے زیادہ افراد ہلاک ہوچکے ہیں۔
