امریکہ کے صدارتی الیکشن میں جوزف بائیڈن کی کامیابی کے واضح امکانات کے پیش نظر نامزد صدر کی سلامتی حکمراں صدر کے برابر کرنے کے ضابطے کے مطابق بائیڈن کی سلامتی کیلئے امریکی خفیہ سروس کے مزید اہلکار ولمنگٹن روانہ کردیئے گئے ہیں۔
ممکنہ نئے صدر کیلئے اضافی فضائی سیکیورٹی اقدامات کا بھی نفاذ عمل میں آگیا ہے۔
امریکا میں 3 نومبر کے صدارتی الیکشن کے اب صرف پانچ ریاستوں پنسلوانیا، ایریزونا، جارجیا، نیواڈا اور الاسکا کے نتائج آنا باقی ہیں۔ جن میں سے چار میں مسٹر بائیڈن کو برتری حاصل ہے۔ صرف الاسکا میں ڈونلڈ ٹرمپ کافی زیادہ برتری لئے ہوئے ہیں لیکن یہ اس لئے لا حاصل ہے کہ وہاں الیکٹورل ووٹس صرف 3 ہیں اور بائیڈن کو اس سے زیادہ فرق نہیں پڑے گا۔
جہاں تک پنسلوانیا کا تعلق ہے تو وہاں اگر ٹرمپ کو شکست ہوگئی تو پھر ان کے لئے صدارت کی دوڑ میں کوئی گنجائش نہیں رہ جائے گی۔
