امریکہ میں شدید گرمی کے سبب 45 افراد ہلاک

ریاست اوریگون کی ملٹنوما کاؤنٹی میں شدید گرمی کی وجہ سے اب تک 45 افراد ہلاک ہوگئے ہیں۔ میڈیکل ایگزامینر پروگرام کی رپورٹ میں 25 جون (جمعہ) سے شدید گرمی کی وجہ سے 45 اموات کی اطلاع ملی ہے

ریاستہائے متحدہ امریکہ کی ریاست اوریگون کی ملٹنوما کاؤنٹی میں شدید گرمی کی وجہ سے اب تک 45 افراد کی موت ہوگئی ہے۔
بدھ کو جاری کردہ ایک رپورٹ میں بتایا گیا ہے کہ اس کاؤنٹی کی میڈیکل ایگزامینر پروگرام کی رپورٹ میں 25 جون (جمعہ) سے شدید گرمی کی وجہ سے 45 اموات کی اطلاع ملی ہے۔

'موت کی ابتدائی وجہ ہائپر تھرمیا ہے ، ایسی حالت میں جس میں جسم کا درجہ حرارت غیر معمولی حد تک زیادہ ہوجائے۔ خیال رہے کہ یہ حالت ماحول میں ضرورت سے زیادہ گرمی برداشت کرنے میں جسم کے عدم مدافعت کی وجہ سے پیدا ہوتی ہے۔'

رپورٹ کے مطابق شدید گرمی کے حوالے سے جمعہ کے روز سے ریکارڈ تعداد میں ہنگامی کالز کی گئیں۔ شدید گرمی سے مرنے والوں کی عمر 44 سے 97 سال کے درمیان ہیں۔
ریلیز میں کہا گیا ہے کہ ان حالات کے پیش نظر جمعہ اور پیر کے درمیان تین کولنگ مراکز قائم کیے گئے ہیں۔ اس کے علاوہ نو لائبریریوں کو کولنگ سینٹر کے طور پر بھی استعمال کیا جارہا ہے۔ اس عرصہ کے دوران تقریباً 8000 افراد ان کولنگ سینٹروں میں آئے ہیں۔

واضح رہے کہ کینیڈا کی راجدھانی اوٹاوا سے ملنے والی اطلاعات کے مطابق ریاست وینکور میں درجہ حرارت میں اچانک غیر معمولی اضافہ سے پارہ پہلی بار 49.5 ڈگری سینٹی گریڈ تک پہنچ گیا۔

خبر رساں ایجنسی کے مطابق مسلسل تین روز سے جاری غیر متوقع شدید گرمی سے کم سے کم 134 افراد زندگی کی بازی ہار گئے۔ حبس اور گھٹن سے دم توڑنے والے افراد میں زیادہ تر بوڑھے اور بیمار تھے۔

ویسٹرن کینیڈا میں گرمی کا 126 سالہ ریکارڈ ٹوٹ گیا، وینکور کینیڈا کے سرد ترین علاقوں میں سے ایک ہے اور اسی لیے لوگوں کے گھروں میں ایئر کنڈیشنر بھی نہیں ہیں۔

یو این آئی