سوڈان کے وزیر دفاع نے اعلان کیا کہ ملک میں 3 ماہ تک ایمرجنسی نافذ کردی گئی ہے۔ انہوں نے کہا کہ اقتدار کی منتقلی تک ملک میں فوج کا کنٹرول رہے گا۔
سوڈان میں گزشتہ کئی ماہ سے صدر عمر البشیر کو اقتدار سے ہٹانے کے لیے احتجاج جاری ہے جس کے بعد جمعرات کو سرکاری ٹی وی نے اعلان کیا کہ مسلح افواج بہت جلد ایک اہم بیان جاری کریں گی۔
سرکاری ٹی وی پر کہا گیا تھا کہ مسلح افواج صدر عمر البشیر کے 30 سالہ دور حکومت کے خلاف کئی مہینوں سے جاری احتجاج اور ان کے خلاف مسلح بغاوت کی قیاس آرائیوں سے متعلق اہم اعلان کریں گی۔
سرکاری ٹی وی کے مطابق 'مسلح افواج بہت جلد ایک اہم بیان جاری کریں گی۔ اس کے لیے تیار ہو جائیں'۔
ادھر دارالحکومت خرطوم میں وزارت دفاع کے دفتر کے باہر ہزاروں افراد کے حکومت مخالف مظاہرے کے بعد فوجی دستے تعینات کر دیے گئے ہیں۔