ممبئی:اداکار نوازالدین صدیقی کی والدہ مہرالنساء صدیقی نے اداکار کی اہلیہ زینب عرف عالیہ کے خلاف ایف آئی آر درج کرائی ہے۔ ممبئی پولیس کے ایک اہلکار نے پیر کو بتایا کہ اداکار نوازالدین صدیقی کی والدہ کی شکایت پر ان کی اہلیہ کے خلاف زیادتی اور جان بوجھ کر تکلیف پہنچانے کا مقدمہ درج کیا گیا تھا۔ ورسووا پولیس اسٹیشن کے اہلکار نے بتایا کہ اداکار کی اہلیہ زینب کے خلاف ایف آئی آر اتوار کو درج کی گئی۔Case Against Nawazuddin Siddiqui Wife
انہوں نے بتایا کہ 'شکایت کنندہ مہرالنساء صدیقی، جو اداکار کی والدہ ہیں، نے الزام لگایا ہے کہ زینب نے ان کے گھر میں گھس کر بحث کی اور ان پر حملہ کیا۔ اس معاملے میں زینب سے پوچھ گچھ کی گئی ہے'۔ انہوں نے کہا کہ زینب صدیقی کے خلاف تعزیرات ہند کی دفعہ 452 (چوٹ، حملہ یا غلط طریقے سے گھر میں داخل ہونا)، 323 (رضاکارانہ طور پر چوٹ پہنچانا) اور دیگر جرائم کے تحت مقدمہ درج کیا گیا ہے۔انہوں نے مزید کہا کہ کیس میں کوئی گرفتاری عمل میں نہیں آئی ہے اور مزید تفتیش جاری ہے۔ دریں اثنا پولیس ذرائع نے کہا کہ یہ واقعہ اداکار، ان کی اہلیہ اور ان کی والدہ کے درمیان جائیداد کے تنازع کی وجہ سے ہو سکتا ہے۔