ممبئی: شہزادہ کے ایک گانے کی شوٹنگ کے بعد اداکار کارتک آرین کو گھُٹنے میں شدید درد ہوا ہے۔ پیر کی رات کارتک نے انسٹاگرام پر ایک تصویر شیئر کی جس میں اداکار اپنے گھٹنے کے درد کو کم کرنے کے لیے برف کے پانی میں اپنے پاؤں بھگوتے نظر آرہے ہیں۔ اس تصویر کو شیئر کرتے ہوئے اداکار نے کیپشن میں لکھا کہ ' گھٹنے ٹوٹ گئے۔۔۔ آئس بکٹ چیلنج 2023 اب شروع ہورہا ہے'۔ جیسے ہی کارتک نے یہ پوسٹ شیئر کیا، ان کے مداحوں نے کمنٹ سیکشن میں اداکارہ کی جلد صحتیابی کی دعائیں بھیجی۔ ایک سوشل میڈیا صارف نے تبصرہ کرتے ہوئے لکھا کہ ' کارتک خیال رکھنا'۔ وہیں ایک مداح نے لکھا کہ ' جلد صحتیاب ہوجاؤ میرے ہیرو'۔ Kartik Aaryan takes Ice Therapy
اگر رپورٹس پر یقین کیا جائے تو کارتک آرین مشہور تیلگو نغمہ 'بٹہ بوما' کے ریمیک کی شوٹنگ کر رہے ہیں۔ تیلگو میں ریلیز ہوا یہ نغمہ بے حد مقبول ہوا تھا۔ اللو ارجن اور پوجا ہیگڑے پر فلمائے گئے اس گانے کو یوٹیوب پر 810 ملین سے زائد بار دیکھا گیا ہے۔ اب کارتک آرین بھی اس گانے کو لاجواب بنانے کے لیے جی جان سے محنت کر رہے ہیں۔ بٹہ بوما کا ہندی ورژن گنیش اچاریہ نے کوریوگراف کیا ہے۔ حال ہی میں کارتک نے گنیش اچاریہ اور شہزادہ کے ہدایت کار روہت دھون کے ساتھ ایک تصویر بھی شیئر کی تھی۔