ممبئی: اداکارہ کنگنا رناوت نے ٹائیگر شراف کی فلم 'گنپتھ' اور بھوشن کمار کی 'یاریاں 2' کا ٹیزر ریلیز کیے جانے کے بعد سخت ردعمل کا اظہار کیا کیونکہ ان فلموں کا مقابلہ اداکارہ کی ہدایت کاری میں بننے والی فلم ایمرجنسی سے ہوگا۔ اداکارہ کنگنا رناوت نے ٹوئٹر پر کہا کہ وہ اپنی آنے والی فلم ایمرجنسی کی ریلیز کی نئی تاریخ کا اعلان کریں گی جسے ریلیز سے ایک ماہ قبل بتایا جائے گا۔ انہوں نے کہا کہ انہوں نے یہ فیصلہ کچھ فلموں، ٹائیگر شراف اور امیتابھ بچن کی گنپتھ اور بھوشن کمار کی یاریاں 2 کے ریلیز تاریخ سامنے آنے کے بعد کیا ہے۔ ان فلموں کو 20 اکتوبر کو ریلیز کیا جائے گا۔ ٹائیگر شراف اور کریتی سینن کی فلم 'گنپتھ' کا ٹیزر بدھ کے روز جاری کیا گیا۔
کنگنا نے اپنی ٹویٹس میں اپنے غصے کا اظہار کرتے ہوئے کہا کہ 'جب میں ایمرجنسی کی ریلیز کی تاریخ تلاش کر رہی تھی تب میں نے دیکھا کہ اس سال کا فلمی کیلنڈر کافی حد تک خالی ہے، شاید اس لیے کہ ہندی انڈسٹری کو نقصان پہنچا ہے، اس لیے میں نے اپنی پوسٹ پروڈکشن ٹائم لائنز کی بنیاد پر اپنی فلم کی ریلیز تاریخ 20 اکتوبر مقرر کی، لیکن ایک ہفتے میں ٹی سیریز کے مالک بھوشن کمار نے 20 اکتوبر کو اپنی فلم کا اعلان کیا'۔ رناوت نے اگلا ٹویٹ کرتے ہوئے اپنی بات جاری کی اور لکھا کہ 'جیسا کہ پورا اکتوبر خالی ہے ویسے ہی نومبر، دسمبر اور ستمبر بھی لیکن آج مسٹر امیتابھ بچن اور ٹائیگر شراف نے 20 اکتوبر کو اپنے پروجیکٹ کا اعلان کیا، ہا ہا لگتا ہے گھبراہٹ میں بالی ووڈ گینگ میں میٹنگز ہورہی ہیں'۔