Bindu on Filmfare awards: مجھے کئی بار فلم فیئر ایوارڈ دینے سے انکار کیا گیا، تجربہ کار اداکارہ بندو

بالی ووڈ میں اپنے ابتدائی دنوں کو یاد کرتے ہوئے تجربہ کار اداکارہ بندو نے کہا کہ 'انہیں فلم فیئر ایوارڈ صرف اس لیے دینے سے انکار کیا گیا کیونکہ وہ اس وقت انڈسٹری میں بہت چھوٹی اور نئی تھیں'۔

بالی ووڈ میں اپنی منفی کرداروں کے لیے مشہور تجربہ کار اداکارہ بندو نے دعوی کیا کہ انہیں اکثر فلم فیئر ایوارڈ کے لیے نامزد کیا جاتا تھا لیکن کئی بار سب سے زیادہ ووٹ حاصل کرنے کے باوجود انہیں ایوارڈ نہیں دیا گیا۔ انہوں نے بتایا کہ مجھے فلم دو راستے کے لیے پہلی بار فلم فیئر میں نامزدگی ملی تھی لیکن انڈسٹری میں نئی ہونے کی وجہ سے انہیں یہ ایوارڈ نہیں دیا گیا جب کہ جیا بچن کو ان کی پہلی فلم کے لیے ایوارڈ دیا گیا تھا۔ Bindu on Filmfare awards

بالی ووڈ میں اپنے کیرئیر کے دوران بندو کو نو بار فلم فیئر ایوارڈ کے لیے نامزد کیا گیا لیکن وہ ایک بھی ایوارڈ حاصل نہیں کرپائیں۔ سال 1962 میں فلم انپڑھ سے فلمی کرئیر کا آغاز کرنے کے بعد بندو نے 1969 میں سب سے زیادہ سراہی جانے والی فلموں اتفاق اور دو راستے میں کام کیا۔ دونوں فلموں نے باکس آفس پر اچھی کمائی کی اور بندو کو فلم اتفاق کے ساتھ ساتھ دو راستے کے لیے پہلی بار فلم فیئر ایوارڈ کے لیے نامزد کیا گیا۔ بعد میں بندو کو داستان اور امیتابھ بچن اور جیا بچن کی مشہور فلم ابھیمان میں اپنی اداکاری کے لیے نامزد کیا گیا۔ انہیں فلم ہوس، امتحان اور رشی کیش مکھرجی کی فلم ارجن پنڈت کے لیے بھی فلم فئیر کی نامزدگیاں ملیں۔

بالی ووڈ ہنگامہ سے بات کرتے ہوئے، بندو نے کہا کہ ' یہ اندر کی باتیں ہیں، میرے کو پتہ بھی چلا تھا کہ سب سے زیادہ ووٹس ملنے کے باوجود مجھے ایوارڈ نہیں دیا گیا۔ ایسا تین سے چار بار ہوا اور یہ ہمیشہ فلم فیئر میں ہوا ہے'۔

انہوں نے مزید کہا کہ 'مجھے دو راستے کے لیے نامزد کیا گیا تھا۔ لیکن وہ ایسے تھے کہ ‘ہم آپ کو آپ کی پہلی فلم کے لیے ایوارڈ کیسے دے سکتے ہیں؟' لیکن ساتھ ہی انہوں نے جیا بہادری کو ان کی پہللی فلم گڈی کے لیے ایوارڈ دیا کیونکہ وہ اس میں ہیروئن تھیں۔ لیکن انہوں نے مجھے نہیں دیا۔ مجھے داستان کے لیے بھی نامزد کیا گیا تھا۔ مجھے ووٹ ملے، لیکن پھر بھی انہوں نے مجھے ایوارڈ نہیں دیا'۔

فلمی صنعت میں ابتدائی طور پر اپنی اداکاری کی صلاحیتوں سے اپنی جگہ محفوظ کرنے کے بعد بندو ان سرفہرست اداکارؤں میں سے ایک ہیں جنہوں نے ہندی فلموں میں کیبرے ڈانس کیا اور اس سے تعریفیں بٹوریں۔ بندو کے علاوہ ہیلن اور ارونا ایرانی نے بھی 70 کی دہائی کے بالی ووڈ فلم میں کیبرے ڈانس کیا اور بعد میں منفی کردار ادا کیے۔