Model Suicide: ممبئی میں ایک ماڈل نے اپنی جان لی، خودکشی نوٹ بھی برآمد

ممبئی کے ایک ہوٹل کے کمرے میں 30 سالہ ماڈل نے پھانسی لگا کر خودکشی کرلی ہے۔ ہوٹل کے کمرے سے خودکشی کا نوٹ بھی برآمد ہوا ہے۔ Model Suicide

ممبئی: اندھیری کے ورسووا میں واقع ایک ہوٹل کے کمرے میں ایک 30 سالہ ماڈل نے پھانسی لگا کر خودکشی کرلی ہے۔ پولیس کو جائے وقوع سے ایک خودکشی کا نوٹ بھی برآمد ہوا ہے۔Model Attempt Suicide

پولیس اہلکار نے جمعہ کو بتایا کہ متوفی کی شناخت اکانشا موہن کے طور پر ہوئی ہے اور لاش بدھ کو برآمد ہوئی ہے۔ انہوں نے کہا کہ پولیس کو شبہ ہے کہ اس نے ذہنی دباؤ کی وجہ سے خودکشی جیسا انتہائی قدم اٹھایا ہے۔ اداکارہ نے اپنی خودکشی نوٹ میں لکھا ہے کہ وہ خوش نہیں ہے اور سکون چاہتی ہیں ۔

ورسووا پولس اسٹیشن کے ایک سینئر افسر نے بتایا کہ واقعہ اس وقت سامنے آیا جب ہوٹل کے منیجر نے پولیس کو اطلاع دی کہ ہوٹل ملازم کے کمرے کا دروازہ کھٹکھٹانے کے باوجود اندر سے کوئی جواب نہیں مل رہا ہے۔

اطلاع کے مطابق یہ ماڈل ممبئی کے لوکھنڈ والا علاقے کی یمنا نگر سوسائٹی میں رہتی تھی اور بدھ کی صبح تقریبا 1 بجے ہوٹل آئی تھیں اور تب سے وہ کمرے میں ہی بند تھیں۔

اطلاع ملنے پر پولیس کی ٹیم ہوٹل پہنچی اور دروازہ توڑ کر اندر داخل ہوئی جہاں اداکارہ کی لاش چھت کے پنکھے سے لٹکی ہوئی ملی۔ افسر نے بتایا کہ جائے وقوع سے ایک خودکشی نوٹ ملا ہے جس میں لکھا ہے 'مجھے معاف کرنا، کوئی بھی اس واقعے کا ذمہ دار نہیں ہے، میں خوش نہیں ہوں، مجھے سکون چاہیے'۔

انہوں نے کہا کہ ورسووا پولس اسٹیشن میں معاملہ درج کیا گیا ہے اور معاملے کی جانچ کی جارہی ہے۔