بی جے پی کی جانب سے نظر انداز کیے جانے کے بعد رکن پارلیمان شتروگھن سنہا آج نوراتری کے موقعے سے باضابطہ طور سے کانگریس میں شامل ہوگئے۔
دہلی میں رندیپ سرجے والا اور دیگر سینئر رہنماؤں نے انہیں پارٹی کی رکنیت دلائی۔
بی جے پی کو چھوڑنے پر افسوس ظاہر کرتے ہوئے انہوں نے کہا کہ' جس پارٹی میں میری پرورش ہوئی اسے چھوڑنا پڑا، مگر مجھے کانگریس میں شامل ہونے کی خوشی ہے'۔
انکا کہنا تھا:'سچ بولنے کی سزا ملی، بی جے پی میں بزرگ رہنماوں کی عزت نہیں'۔
انہوں نے مزید کہا کہ' اڈوانی اور یشونت سنہا کے ساتھ جو ہوا اس سے مجھے بہت دکھ ہوا'۔
گذشتہ مہینے 28 مارچ کو شتروگھن سنہا نے کانگریس صدر راہل گاندھی سے ملاقات کی تھی اور پارٹی میں شامل ہونے کو لے کر ان سے بات چیت کی تھی۔ اس کے بعد انہوں نے اعلان کیا تھا کہ نوراتری کا پہلا دن مبارک ہے اور اسی دن نئی شروعات ہوگی۔
یہ تقریباً طے ہے کہ شتروگھن سنہا کانگریس کے ٹکٹ پر پٹنہ صاحب سیٹ سے الیکشن لڑیں گے وہ پہلے سے ہی کہتے رہے ہیں کہ حالات جو بھی ہوں، لوکیشن وہی ہوگا'۔
بی جے پی نے ان کے باغی تیور کو دیکھتے ہوئے پٹنہ صاحب سے مرکزی وزیر روی شنکر پرساد کو اپنا امیدوار بنایا ہے۔