وندے بھارت مشن کے تحت دبئی سے 189 بھارتی بنارس پہنچے

پوری دنیا میں کورونا وائرس کی مہلک وبا کی وجہ سے بین الاقوامی پروازوں پر پابندی عائد ہے۔ ایسے میں ایک ملک کے افراد دوسرے ملکوں میں پھنسے ہوئے ہیں۔

مرکزی حکومت بھارتی شہریوں کو دوسرے ملکوں سے بھارت لانے کے لیے 'وندے بھارت مشن' چلا رہی ہے جس کے تحت پہلے مرحلے میں 18 مئی کو لال بہادر شاستری انٹرنیشنل ایئرپورٹ بنارس پر لندن سے 82 مسافر پہنچے تھے۔

آج اس مشن کے تحت دبئی سے 189 مسافروں کو لے کر خصوصی طیارہ ورانسی ایئرپورٹ پہنچا۔ ایئرپورٹ پر طیارہ کے اترنے کے بعد سوشل ڈسٹینسنگ پر عمل کرتے ہوئے میڈیکل ٹیم کے ذریعے سبھی مسافروں کی تھرمل اسکریننگ کی گئی۔ ایئرپورٹ پر سبھی مسافروں کو ریاستی حکومت کی ہدایات کے تحت ایک فارم پر کرایا گیا۔

سبھی مسافروں کے سامان کو سینیٹائز کرنے کے بعد امیگریشن و کسٹم کی جانچ کی گئی۔

واضح رہے کہ 25 مئی سے گھریلو پروازوں کی اجازت مل گئی تھی جبکہ بین الاقوامی پروازوں پر ابھی پابندی عائد ہے۔